Голосник

Людмила Шандалова здобыла перше місце в літературнім конкурзі

В четверь 12-го децембра 2019-го року проходило в просторах Consillium maius Пряшівской універзіты в Пряшові святочне выголошіня 6-го річника Літературного конкурзу Марії Мальцовской за найліпшы творы в области  поезії, прозы, есеїв і драмы в літературнім русиньскім языку.

Перше місце в конкурзі, котрый орґанізує Сполок русиньскых писателів тот рік здобыла зо свойов поезійов вже знама русиньска писателька Людмила Шандалова.

Двоми дебутанты

Тот рік ся до конкурзу залучіло довєдна девять авторів, котры загнали свої творы в розсягу 10 аж 20 сторінок (дотеперь непублікованого тексту). Творы пришли з области поезії і прозы.

Журі, котра была в складі Михал Павліч, Аліца Вієтошевова і Кветослава Копорова, оціньовала тексты Мілана Ґая, Штефана Смолея, Елены Хомовой Гріньовой, Меланії Германовой, Миколая Ксеняка, Юрка Харитуна, Людмилы Шандаловой, но потішуючім фактом є, же были і двоми дебутанты.

Із свойов прозов – оповіданями про дітей, ся першый раз представила Марія Шмайдова а під псевдонімом ся до конкурзу залучіла і Вєра Горішня, котра загнала дітячі стишкы.

Перше місце про Шандалову

Меджі оціненыма в конкрзі была і дебутантка Марія Шмайдова, котрій журі уділило третє місце. На другім місці із своїма стихами скінчів Юрко Харитун. З новов поезійов конкурз выграла Людила Шандалова.

Людмила Шандалова (1964 р.) має дотеперь выданы три книжкы. Збірку дітячіх стишків Подьте, дїти, што вам повім (2014 р.), прозу Червеный берег (2016 р.) і далшу збірку поезії про дітей під назвов Ани бы сьте не вірили (2018 р.). Окрім того написала пять театралных дітячіх пєс.

У 2015-ім році дістала за свій дебут Премію Александра Духновіча за русиньску літературу. У 2017-ім році за прозу Червеный берег уділив їй словацькый Літературный фонд Ціну Александра Павловіча. В Ліетературнім конкурзі Марії Мальцовской брала дотеперь участь трираз, двараз была друга і раз третя.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі