Made in Lemkovyna

0

Вшыткы лем про тото, што Кытайці вытворили. А патріоты повинны ставляти на своє. Конечно на тото, што выходит з нашой землі. Товды можеме си надрукувати на нашых продуктах Made in Lemkovyna. 

Тото, што наша підредакция має своіх доносителів, знают вышткы. Найвеце спати не дає то тым, якы фурт ся нас боят, же дашто з міха вытягнеме. Тым разом было легко. Єден інформатор з околиц Высовы донюс нам справу повязану глубоко з нашом земльом. Бо то в єй глубинах находит ся тото, што нашы предкы столітями цінили – вода. Прото і воду днес конфіскуєме. 

Тота вода з Высовы, знана як «Высівянка», тепер буде робила на хосен партнерскых односин медже Лемковином а Кытайом, медже Руснаками а Кытайцями. До Высовы уж встигли дотерти продукты просто з жолтого континенту. Но то вкінци час на наш рух. Тепер сме Кытайцям дали нашу воду. Тоту саму, што в Устю ци Смереківци в склепі можете купити. 

Як дале доносит інформатор, контенер з «Высівянком» доплыне шыфом до Шанґгаю за близко 40 дни. І думате, же то припадок? Ніт! Як раз буде тото в околицях 15. лютого/фебруара, значыт товды, коли нашы партнеры Кытайці одпразднуют Новий Рік. Перешмарили ся бідны з «Советское игристое» на лемківску воду. Но ци то не єст прекрасна віст?!

Іщы лем треба Вам пояснити, одкаль тота любов. Вшытко взяло ся од віцепрезеса заряду Здрою Высова. Ходил до Кытаю на прогулькы і так ся зачало. Но, першыраз наша вода пішла в Кытай в квітни/апрілю 2017 рока. 

А одкаль ся вода взяла під высівском земличком? Мы маме на тото поясніня, але кус нам не пристоіт гевсе ту презентувати. Повіме вам лем, же нашы прапрадідове, як то люде, мали тіж своі потребы. Вшытко зробила натура Made in Lemkovyna. 

майте ся – підредакция фафринді і сконфіскуваного

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2018. Вшыткы права застережены.