Голосник

«Маґурич» в Маластові, Высові та Лоси

Подля  інформаций з марця т.р. про тогорічний плян діянь «Маґурича», стоваришыня свій перший робочий табір зачынат на Лемковині. Працы будут ведены в днях 30.04 – 7.05 т.р., не лем на цмонтери в Маластові, але тіж в другых русиньскых селах на лемківскым боку Карпат, т.є. Высові та Лоси. В Высові орґанізоторы заплянували роботу при єдным з крестів, котрий находит ся на холеричным теметові, а окрем того підоймут ся ремонту другого креста, находячого ся при єдным з пути. В Лоси буде подібні – і гын буде ремонтуваний придорожний крест.

Стоваришыня «Маґурич» окрем тяжкой, але хосенных старань для сепульклярной штукы Лемковины, ґварантує і мериндю, нічліг та зворот коштів подорожы. Контакт до орґанізаторів найдете за тым мотузком.

Хоц офіцияльно табір зачне ся в найблизшу суботу од стрічы вольонтерів в Новици, робота над єдным з крестів на высівскым цмонтери уж ся зачала. Желізна част памятника – поламаний крест – одданий єст уж до скорой реконструкциі (подібні як пят інчых крестів з Маластова – буде наново споєний, малюваний і піскуваний).

Дальшы заплянуваны таборы будут проходити поза Лемковином, м.ін. в липци/юлию (2-17.07) одбуде ся ремонт нагробків на грекокатолицкым цмонтері в Старій Гуті (ґміна Нароль) на Розточы і в серпни/авґусті (31.07–14.08) ремонт нагробків в Тарнаві Нижній на Украіні і в Лісковатым (ґміна Устрикы Нижні).

фот. цмонтір в неістнуючым селі Баниця к. Ґладышова; знимка з лютого/фебруара 2016 р.; архів лем.фм.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі