Голосник

Маєрьскый: пріорітов Свідника суть драгы і турізм

0
Председа Пряшівского самосправного краю (ПСК) Мілан Маєрьскый в рамках своїх планованых выїздів по окресах краю навщівив у четверь 25-го апріля 2019-го року Свідник. Інформовала о тім говоркыня ПСК Даша Єленьова.

Із старостами сел, представителями пріватных компаній і орґанізацій з реґіону діскутовав о актуалмых проблемах, але і о потенціалі майже 33-тісячового окресу. На стрічі ся бісідовало і о найслабшых місцях реґіону а можливостях ПСК помочі, жебы условії зліпшыти.

„Самособов то не є вопросом єдной стрічі, але треба десь зачати і глядати довєдна рішіня, як тот реґіон ожывити,“ повів на выїзді Маєрьскый. Свідник притім належыть ку найменше розвитым окресам в Пряшівскім самосправнім краю і в рамках Словакії,  зато є подля председы Маєрьского треба прямо на місці спознати погляды людей, котры в окресі жыють і нелем пасівно слухати, а і дати вклад ку зліпшіню позіції реґіону під Дукльов і ку наштартованю розвитку.

Пріорітов є добудованя драг

Як председа ПСК інформовав, пріорітов про окрес Свідник є добудованя драг, головно северной части драгы R4, што має фунґовати як скоростна драга (неплачена автострада). Жупан собі усвідомлює, же крайска самосправа не має на тото прямый досяг, но буде просаджовати, жебы держава тоту аґену ускорила і жебы в штонайскорішім часі была драга у вшыткых частях реґіону збудована.

Кедьже суть подля жупана драгы пріорітов, меджі планованыма інвестіціями в тім році є і реконштрукція моста в Ладомировій, частей драг Местиско – Свідник, Гарбовчік – Рівне, Капішова – Кружльова, Гунківці – Кореївці, Ладомирова – Ваґрінець.

836 тісяч на „Лемків і Русинів“

Пряшівскый жупан із участниками засіданя діскутовав і о розвитку турістічного руху, будованю біціґльовых стежок і конкретных проєктах підтримуючіх турістічный потенціал реґіону, котрый ся розвивать вдяка множеству културных, сакралных і воєньскых памяток в нім.

Окрес Свідник є притім успішный і при здобываню еврофондів в рамках черезгранічной польско-словацькой співпраці і проґраму Interreg. Актуално є підпореный проєкт міста Свідник під назвов Богатство розмаїтости – вытворіня черезгранічного турістічного продукту основаного на културній дідовизні Лемків і Русинів, котрый з дотаційов 836 тісяч поможе в пригранічній области збудовати різны елементы інфраштруктуры і условії про вольночасовы актівности.

Місто здобыло і далшый великый ґрант із Европского фонду реґіоналного розвитку. Понад 680  тісяч евр має іти на ціложывотну освіту, здобываня здібностей і знань в турістічнім русі.

Окрес Свідник быв по Старій Любовні і Меджілабірцях третім в рамках выїздів председы ПСК од зачатку рока. Найближе має іти до окресу Гуменне.

Жрідло фотоґрафії: Prešovský samosprávny kraj.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар