Мож голосити ся на Карпатьску писанку 2018

0

Вігорлатьскый музей в Гуменнім і тот рік приготовлює вєдно із Унійов жен Словакії вже 26-ый річник конкурзной выставкы писанок під назвов Карпатьска писанка 2018 (Karpatská kraslica 2018). Выставка буде проходити од 8-го марца до 6-го апріля 2018-го року і орґанізаторы звертають увагу, же іщі все є час приголосити і вашы писанкы.

Авторы, котры роблять писанкы, без різніці віку і хоснованой технікы, можуть свої творы загнати або особно принести до 28-го фебруара 2018-го року на адресу: Vihorlatské múzeum v Humennom, Námestie slobody 1, 066 01 Humenné. Оголосити ваш інтерес загнати свої писанкы до конкурзу треба до 26-го фебруара, по тых термінах вже не буде мож брати творы до выставковой колекції.

Як інформовала Яна Федічова із Вігорлатьского музею, дотеперь в Гуменнім выставльовало ся майже 21 тісяч писанок од 400 авторів і выставку навщівило майже 49 тісяч людей. Минулый рік в рамках Карпатьской писанкы выставльовало шістьдесять авторів писанок зо Словакії і веце як дві десяткы авторів із Україны, Польщі, Мадярьска і Чеськой републікы.

Конкурзна выставка все презентує колекції традічных, но і новшых технік крашіня яєчок, котры ся всокотили, а і надалше розвивають в окремых областях Карпатьской котловины.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Share.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2018. Вшыткы права застережены.