Мурянка і Терочка вкажут лемківску культуру в Щеціні

0

Православне Стоваришыня св. Миколая зо Щеціна просит на концерт в рамках проєкту Вірны Традициі. Запрезентуют ся на ним: найславнійший лемківскій поета Петро Мурянка та ансамбль Терочка.

Петро Трохановскій, псевдонім Петро Мурянка, то чловек інституция – поета, композитор, дириґент, учытель, дяк, писменник, редактор, знаний бодай каждому Русинови. Його заслугы для русиньского народу сут не до оцініня. Ціле жытя посвятил соспільній діяльности, а в духу лемківского патріотизму выховал уж пару поколінь. Для чысленных єст авторитетом і недосягненым взірцьом. Свойом діяльністю, на просторі парудесятьох років, прислужыл ся не лем розвиткови лемківской культуры, але причынил і фурт причынят ся до популяризуваня знаня про дідицтво і спадковину жытелів Низкого і Сандецкого Бескідів. Єст часто запрашаний в роли амбасадора Лемків по цілій Польщы і вельох місцях Европы. Зовнішні середовискa, власти та інчы інституциі достерігают і доціняют його труд, чого доказом сут чысленны нагороды і выріжніня, лем в остатнім часі был Петро Мурянка нагороджений одзнаком «Заслужений для Сандецкой Землі», признаваном Радом Новосандецкого Повіту.

Ансамбль Терочка діє попри Стоваришыню Руска Бурса в Ґорлицях, оснований был в 2008 році. Актуальні ведений єст Андрийом Трохановскым, сыном Петра Мурянкы, котрий єст тіж і автором аранжаций на хор і капелю співанок презентуваных молодыма Лемками. Ансамбль бере активну участ в подіях повязаных з русиньском культуром в Польщы, Словациі, Хорвациі, Сербіі. Його членами єст молодіж з Лемковины.

Вчас суботнього концерту почути буде мож традицийны русиньскы народны співанкы і авторскы композициі.

Подія буде проходила 17. червця о 15.00 год. в Зоні Студентской Культуры в Щеціні (ул. Мальчевского 10). Почестний патронат над концертом тримат Президент Міста Щецін.

Share.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од штырьох років доносит о вшыткым, што ся діє на Лемковині. І не лем. Контакт: natalia@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.