Голосник

Музей Варгола выставлює унікатны образы із атентату на JFK

0
Унікатны творы Енді Варгола представили в пятніцю 14-го децембра 2018-го року в Музею модерного уменя Енді Варгола в Меджілабірцях. Іде о портфолію Flash і выставлює ся на Словакії по першый раз.

Єденадцять творів захоплює атентат на америцького презідента Джона Фіджералда Кенеддіго. Образы пожычав найвешкій стабілній експозіції краля поп-арту в Европі пріватный збератель. Інформовав о тім словацькый денник Korzár.

Першый раз на Словакії

Портфоліо Варгола під назвов Flash є комплетне, навеце означене як унікатне. На Словакії тото портфоліо іщі не выставльовало ся. Його вартость є приблизно 120 000 евр.

„Іде о серію єденадцятьох образів із 1960-ых років. Захоплюють три дні по атентаті на америцького презідента Кенеддіго. Ендіго ани так не заінтересовав тот атентат, як медіалне бісніня, котре потім спустило,“ повів о новій експозіції директор Музею модерного уменя Енді Варгола Мартін Цубяк.

Пріватный збератель пожывав музею в Меджілабірцях тоты унікатны творы на невстановлено довгый час.

Нетіпічна подоба

Творы Варгола зображують презідента тісно перед наступліньом до авта, його сміючу ся жену Джекі, пушку, із которой ся стріляло, облак, із котрого убийця стріляв, убийцю на поліцайній станіці в Далласі і фраґменты аґентурьных вістей інформуючіх о шокуючій дії.

„Тота дія была єднов із найслідованішых 20-го столітя і Варгол як документатор добы і їй важных пунктів не міг тоту тему выхабити. Обробив єй в нетіпічній поп-артовій подобі до візуалного концепту,“ повів Цубяк.

Образы суть як кебы розмазаны за фолійов, што сімболізує нелем безперерывный тиск пресы і высыланя новостей, котры приносили все новы і новы інформації, але і таємніцю, як ся ціла дія, котра травматізовала цілу сполочность, одограла. Варгола фасціновала всядыль участна емоціонална сила медій, пише словацькый денник.

О музей є інтерес

Навщівность унікатного Варголового музею має піднимаючу ся тенденцію. В тім році підняла ся о приблизно 30 процент і музей ся тішыть, же прибывають навщівници із Словакії. В минулости было веце загранічных гостів, головно із сусідніх держав. Окрім Антарктіды мають за словами лекторкы Ярмилы Сухой навщівників із каждого контіненту.

Жрідло фотоґрафії: Revolver Gallery.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

 

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар