Музыканты, співакы, аж і танцюристы – мож записувати ся до участи в конкурсі!

0

Тырват рекрутация до ІІІ едициі Змагань Автентичных Музыків. Зголосити можут ся солисты – співакы та інструменталисты, інструментальны або співочо-інструментальны ансамблі, співочы ґрупы, аж і гуляючы пары зо свойом капельом, котры выконуют корінну музыку або інтерпретуют традицийний репертуар.

Треті Змаганя Автентичных Музыків будут проходити од 31. серпня/авґуста до 3. вересня/септембра т.р. Місцьом выступів буде сідиба єдной з найважнійшых музычных інституций на Західнім Помори, заєдно ікона сучасной культуры – Фільгармонія в Щеціні, котра на пару дни выполнит ся богатством нематерияльной спадковины і даст нагоду стрітити ся з традицийном музычном культуром.

Фільгармонія стала ся плятформом ци місцьом, аж і святиньом, отвертом для народной культуры, котром долгыма роками погорджувано, яку вызнавано за низку культуру, што єст недосконалым і непрецизийным понятьом, жебы не повісти – недобрым – бесідує проф. др габ. Боґдан Матлавскій, ведучий жырі Змагань Автентичных Музыків. Отвертіст форм фестівалю спричынила, же денекотры презентациі, якы до той поры проходили, шокували, інчы давали доказ тому, же вшытко єст на добрій дорозі – продолжат.

Змаганя то конфронтация і стрічы творців народной музыкы, якы берут з ріжных джерел: од реконструкциі через фольк, джез аж по експериментальну музыку. Зголосити можут ся так аматоры, як і професийны музыкы. Трафило ся уж, же спільне музыкуваня по офіцийных переслуханях ци вчас фестівальовых варштатів зродило новы проєкты.

Найбарже любит ся мі в Змаганях Автентичных Музыків тота отверта формула. Гев каждий може выграти нагороду – як лем ма інтересуючу думку, знат заспівати свою ноту на свій спосіб. Найважнійше, же глядаме особливости, артистів, котры мают штоси до повіджыня і знают тото зробити – арґументує Кжыштоф Требуня-Тутка, член жырі.

Попередні едициі згромадили на сцені Фільгармоніі більше як 300 выконавців репрезентуючых мало не вшыткы обшыри Польщы. Змаганя проходят в штырьох музычных катеґориях, а од того рока участ в конкурсі можут взяти танцювальны пары зо свойом капельом. В каждій катеґориі передає ся нагороду, а іх загальна сума то 25 тис. зл.

Участ зголошувати мож іщы лем до 21. липця/юлия т.р., выполняючы простий формуляр. Выграны запрезентуют ся 3. вересня/септембра вчас фіналового концерту в золотій симфонічній сали Фільгармоніі в Щеціні.

Фот. Анджеля Ґабер + Тріо вчас минулорічных переслухань. Артистка мат в своім репертуарі так авторскы композициі, як і народны співанкы, в тым руснацкы. Джерело: turniej.filharmonia.szczecin.pl

Поділь ся.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од штырьох років доносит о вшыткым, што ся діє на Лемковині. І не лем. Контакт: natalia@lem.fm

Лиш коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.