Голосник

Нагодора ім. Никыфора для Івана Дзядика

0
Тырват 39. Лемківска Ватра на Чужыні. В першый ватряный ден капітула Стоваришыня Лемків врyчыла нагороду ім. Никыфора – Епифана Дровняка, за діяльніст в обшыри лемківской культуры. Статую 2. серпня/авґуста 2019 р. отримал Іван Дзядик.

Традицийно, Андрий Копча, ведучый Стоваришыня Лемків, в ватряный вечер оголосил зо сцены, што тогорічне оцініня передане буде для Івана Дзядика, долголітнього члена СЛ.

Оцініня за капітулу передали ведучый ГЗ СЛ Андрий Копча і заступця др габ. Олена Дуць-Файфер. В вводным слові А. Копча розповіл про жытя лавреата. Внет оголосил, што нагорода Никыфора за 2019 р. рішыньом капітулы іде в рукы Івана Дзядика за заслугы на ниві лемківской культуры і труд жытя.

Вручыня Никыфора зышло ся з ювілейом 80. народин лавреата. Іван Дзядик пришол на світ в 1939 році во Фльоринці на західній Лемковині. То культурный і церковный діяч, орґанізатор Лемківскых Ватр на Чужыні, конферансиєр та гумориста. Долгы рокы дописує до часопису «Бесіда». Опубликувал тіж споминову книжку про подорож до Святой Землі, котра явила ся по лемківскы. Част з гуморесок лавреата мож было чути в ефірі нашого радия.

Никыфор то нагорода, котра што рік є признавана особі, яка свойом діяльністю внесла дашто цінне в пошырюваня, розвиток і плеканя лемківской культуры. Дотепер лавреатами нагороды сут м.ін. Павел Стефановскій, Петро Трохановскій, Ярослав Трохановскій, Адам Барна, Ярослав Горощак, Олена Дуць-Файфер, Андрий Копча, посмертно Михал Романя, а влони Мария Стеранка-Трохановска, солистка леґендарной Лемковины з Білянкы.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар