Голосник

Наливка Старого Лемка і інчы такы…

0

Овочевы дерева то такій елемент краєвиду Лемковины, котрий може выкликувати преріжны емоциі. Може вводити в задуму, в мелянхолію, може принести тугу, смуток, зліст, але тіж надію – денекотры річы фурт тырвают, фурт можут ся одраджати.

Вільшня, Свіржова Руска, Розстайне, Жыдівскє, Тиханя, Незнаєва то особливы місця. В опустошеных селах яблінкы, грушы, черешні, што квитнут на яр, роблят великє вражыня, але не до вшыткых мож свобідні дойти, зато же находят ся на обшыри Маґурского Нацийонального Парку. Єдном з задач, котру реалізує парк є дбаня про дерева, якы тепер, хоц посаджены через люди попри хыжах і ґаздівках, по парудесятьох роках сут натуральном частю дикой обшыри хороненой парком. В парку подумали припомнути ролю, котру дерева полнили долгыма роками – а давали овочы, котры пак мож было хоснувати на вельо способів.

Кінцьом минулого рока Маґурскій Нацийональний Парк оголосил конкурс на найліпший ци найцікавший традицийний перепис на тото, што мож зробити з овочів. До кінця січня/януара т.р. 34 особы надослали рецептуры на розмаіты сокы, повила, мармоляды, компоты, наливкы/тінктуры і печене. Комісия выбрала 20, котры перешли до дальшого етапу. Окрем самого перепису, при выборі фіналовой двадцеткы жырі брало до увагы опис місця, з котрого взято овочы, і спомины звязаны з місцьом ци рецептуром. В дальшій части то голосы інтернавтів рішыли о тым, хто выграл. Дo 13. лютого/фебруара 2018 р. мож было на фейсбуковым фанпейджы парку оддавати голос. До остатньой хвилі не было знатя, кому припаде котре місце. Конец кінцьом, по порахуваню голосів (а властиві по тым, як однято од чысла ляйків неправилны голосы) першы три місця заняли:

  • І місце заняла Евеліна Пульнар за перепис на вільгітне кісто зо сливками, грушками і посыпком з цукру, масла і мукы
  • ІІ місце занял Дмитро Сим за рецептуру на Наливку Старого Лемка з овочів тернины
  • III місце заняла Кристина Маршалек за рецептуру на наливку з ароніі
  • выріжніня за найбарже традицийний перепис отримала авторка рецептуры на овочевы булочку – Божена Воліньска

Парунадцет переписів буде выдрукуваных в специяльным зошыті рецептур, котрий буде мож одобрати дармо в сідибі Парку. Вшыткы рецептуры найдете за тым мотузком.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар