Голосник

Народностны справы (і по русиньскы) ідуть вже 10 років

0
Точно 13-го януара 2009-го року першый раз приголосили ся в державній Словацькій телевізії (Slovenská televízia) із кошыцького штудія Народностны справы. В тых дня Розглас і телевізія Словакії (Rozhlas a televízia Slovenska, RTVS) торжественно припомяне собі тот округлый юбілей.

Святковати мож нелем десятьрічніцю інформачного телевізного тыжденника про народностны меншыны, а і то, же то свойов формов єдиный проґрам і мож повісти піонірьскый проєкт в рамках телевізного высыланя в Европі обще, бо подобной релації не є.

Майже 400 выдань в языках народностных меншын

Од спомянутой даты было до 13-го януара 2019-го року одвысыланых 388 выдань того тыжденника. Як інфомровав RTVS, в тых выданях было зробленых цілково 1700 репортажів. Были то інформації із жывота вшыткых 13-ох державов вызнаных народноснтых меншын, котры жыють на Словакії. Народностны справы припоминають вшытко, чім народностны меншыны на Словакії жыють, ці уж то їх свята, традіції, памятны дні або вызначны културно-сполоченьскы події.

Народностны справы суть все модерованы в єднім із языків на Словакії вызнаных народностных меншын, в рамках проґраму ідуть пак репортажі і в іншых народностных языках. За десятьрічну історію проґраму были і выняткы, кедь в телевізії зазвучали і языкы такых меншын, котры не суть офіціално вызнаны, наприклад вєтнамскый, іспаньскый, французькый ці італійскый.

Народностны справы реґуларно ходять модерованы і по русиньскы. На русиньскых выданях довгодобо роблять Ярослава Сисакова і Валерія Фірєшова як модераторкы і Петро Медвідь як тлумач сценаря. Репортажі забезпечує RTVS. Окрім того ся в RTVS каждый другый тыждень выраблять і окремый Русиньскый маґазин. Тот зачав писати свою історію скоріше.

Одсвяткують в Кошыцях

Редакція народностного высыланя RTVS – телевізне штудіо Кошыці собі округлу річніцю успішного і про народностны меншыны цінного проґраму святочно припомяне дома, в Кошыцях, у віторок 26-го фебруара.

Державна телевізія і такым способом хоче подяковати вшыткым, котры співрацують на творіню Народностных справ, проґрамі, котрый є богатый на языкы і на інформації. Як інформовала сторінка RTVS, державный телерозглас тішыть ся із того, же історія Народностных справ продовжує і тот рік дале.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар