Недожытый юбілей Ґая припомянуть выставков

0

Шарішска ґалерія в Пряшові на 14-го септембра 2017-го року приготовила вернісаж выставкы під назвов Андрій Ґай (1935 – 2016), котра є присвячена недожытому жывотному юбілею 85-ох років маляря русиньского походжіня Андрія Ґая. Куратором выставкы, котра буде в просторах ґалерії до 5-го новембра, є Йозеф Ріділла.

Андрій Ґай быв родаком із  Сукова, в окресі Гуменне. Закінчів Руську ґімназію в Гуменнім і далше штудовав на Высокій школі вытварных умень в Братіславі. По абсолвованю высокой школы зачав робити в Пряшові як вытварный редактор україньской ґазеты Дружно вперед. Єден час робив на Педаґоґічнім інштітуті і Катедрі вытварной выховы Педаґоґічной факулты Універзіты Павла Йозефа Шафарика в Пряшові. Од 1973-го року быв свободным умелцьом. Ґай мальовав головно пейзажі, портреты, фіґуралны композіції, закутя. Вытворив множество монументално-декоратівных творів у архітектурі, мальб на стіну, камянных і керамічных мозаік. Андрій Ґай мав веце як 50 окремых і 150 колектівных выставок. Здобыв дакілько оцінінь і нагород. По 1989-ім році приєднався до ку далшым пряшівскым умелцям на выставках русиньского уменя. Умер у 2016-ім році в Пряшові у віці 84-ох років.

Вернісаж выставкы, котра припомяне богату творчость Ґая, обогатить і Марька Мачошкова, котра заспівать в музичнім супроводі з Іґором Кретом. Одкрытя експозіції зачінать в четверь о 16.00 год.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Поділь ся.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Лиш коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.