Голосник

Неодолга ювілейны подіі Кычеры

0
Од 22. до 27. жолтня/октобра 2018 р. в Ліґници проходити будут вшелеякы акциі в рамках подіі пн. «Кычерияда над Качавом». Головном єй цілю є пошырювати історию і культуру Лемків та запрезентувати 25-річну діяльніст Лемківского Ансамблю Пісні і Танця Кычера.

В тыжньовым проґрамі орґанізаторы передвиділи шор стріч, выстав, концертів і інчых. Зачне ся од стрічы з бардом Лемковины, Петром Мурянком, якій на запрошыня Кычеры має приіхати в понедільок до Ліґниці. В тот ден пройде і вернісаж выставы, яка приближыт головно польскым інтересантам культуровы і історичны обставины жытя Лемків, в тым еґзистуваня по 1947 р. на чужыні.

Акцийом, на котру вынятково горячо просят орґанізаторы, буде премєровий показ фільму «Там досправды жыли сме як в раю». Был він зрыхтуваний членами колективу, якым допомагали представникы старшого поколіня переселенців. Продукция ансамблю Кычера є такой аматорском продукцийом, але зрушат серця. Вказує она на глубины лемківской душы. Прикликує до рефлексиі. Дає звіданя о выгнаня, як і сенс жытя. Через сесе фільм являт ся універсальным, зрозумілым не лем для самых Лемків. На пакіст вшыткому, дає жытя, дає надію, чытаме в запрошыню на премєру.

Середа буде дньом полным класичной музыкы. В концерті пн. «Лемко в опері» презентувати будут ся бывшы члены ансамблю, якы в своім пізнійшым жытю завершыли музычны академіі і продолжали музычну карєру. Окрем них выступлят і другы артисты, часто долголітньо спілпрацуючы з колективом.

В четвер буде інчий рід музыкы. Тот ден присвячений має быти модерній ґрупі Надія, яка при нагоді ювілею фольклорного ансамблю Кычера святкує і свою 10. річницю возникніня. В концерті пн. «Надія і єй гості» послухати буде мож подібны лемківскы ґрупы, якы тіж грают на сценах поєдных фестівалів і ватр.

Суботнє передполудня належало буде до наймолодшой ґенерациі. В рамках проєкту «Лемколяндия» орґанізуваны будут артистичны варштаты та проєкция анімуваных байок в лемківскым языку.

Фінішом тыжньовых празднувань 25-літя діяльности ліґницкого ансамблю має быти суботній ґальовий концерт теперішніх, але тіж бывшых членів, якы по роках вернут хвильово на сцену. Пізным вечером пройде «Баль Кычерияка» – ювілейна забава получена з остатками.

Більша част акций проходила буде в Рыцарскій Академіі в Ліґници.

 

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар