Голосник

«Никыфор маляр – Никыфор артиста»

0
«Никыфор маляр – Никыфор артиста» то назва выставы, котру Музей Никыфора в Креници орґанізує з нагоды 50. річниці смерти Епіфана Дровняка. Вернісаж пройде 23. червця/юнія 2018 р. о 12.00 год.

Експозиция інавґурує цикль культурных подій звязаных з 50. річницьом смерти лемківского артисты, яка припадат на 10. жолтня/октобра т.р. Скорше, бо 21. червця/юнія орґанізуєме в Креници містну гру пн. «В світі Никыфора» – бесідує Збіґнєв Волянін, куратор Музею Никыфора. 11. липця/юлия запрашаме на проєкцию фільму «Мій Никыфор» в Головній Пияльни, а по фільмі пройде стріча з авторком сценария до фільму, Йоанном Кос-Краузе, та акторами, котры грали в фільмі. 9. жолтня/октобра одбуде ся торжественна стріча в Бальовій Сали Старого Здройового Дому. То сут головны подіі святкувань річниці. В междечасі проходити будут інчы, меншы подіі, о котрых будеме іщы інформувати – кінчыт куратор. Орґанізатором вшыткых подій є Округовий Музей в Новым Санчы, одділіньом котрого є Музей Никыфора в Креници.

Вернісаж прикрасит выступом хор Зоря з Устя Руского. Почестний патронат над подійом має Дариюш Ресько, бургомайстер Крениці. Выставу буде мож обзерати до 11. листопада/новембра 2018 р.

Выставі товаришыт мысель Єжы Вольфа: Штука є проявом жытя особливых верств душы. Як таємне мусит быти жытя душы, называной нами примітивном, коли возникают з ней шедевры? /…/ Протягом віків замалювано незрахувану кількіст полотен і дощок, а тоты кавальчыкы паперя не припоминали властиві нич, што-м до той поры виділ. Цитуваня походит з книжкы Є. Вольфа Маляре наівного реалізму в Польщы, Никыфор печатаной в 1938 р. Єжы Вольф был професийным маляром і критиком штукы, єдным з одкрывців таланту Никыфора і колекцийонером його творчости.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар