Голосник

Нове жытя для памяткового будинку желізницьового дворця в Коросні

Уж в найблизшу пятницю, 13. грудня/децембра, свою діяльніст зачне Етноцентр Коросняньской Землі. Думка створити такій обєкт явила ся в 2015 році, од того тіж часу зачали ся стараня переняти рахуючый більше як 130 років будинок дворця ПДЖ (Польска Державна Желізниця – поль. PKP), а пак зробити конечный ремонт. І так по місяцях робіт можеме видіти ефекты того проєкту.

Задачом Етноцентра єст приближыти історию реґіону полудньовой Польщы і вказати богату і ріжнорідну народну культуру. Додатковом цілю інституциі є підтримувати памят і передавати знаня молодшым поколіням в приступный і модерный спосіб.

Коли і што буде мож обзерати в Етноцентрі?

Згідні з пляном великє одкрытя пройде уж в тоту пятницю, 13. грудня/децембра. На початок свойой діяльности Етноцентр просит на вікендовы одкрыты варштаты, котры будут проходити од пятниці до неділі, 15. грудня/децембра. В богатым проґрамі, заполненым ріжного рода атракциями од 10.00 аж до 20.00, мож найти пропозициі для наймолодшых, але і для тых дакус старшых, а тіж і такых, што при выставах будут мочы поспоминати і самому дашто оповісти. В часі тридньовой одкрытой подіі буде мож взяти участ в варштатах тканя макаток, шытя і прикрашаня торебок, аж і варштатах погіряньского гафту, котры вела буде Анна Мария Зиґмунт, проєктантка колекциі облечыня «Лемковина». Окрем того будут варштаты робліня карпатскых прикрас з Евеліном Матусяк-Выдерко, варштаты вырабляня простых музичных дутых інструментів і гры на них, варштаты робліня чачок з глины та зілярскы варштаты. Свою участ в промуваню Етноцентра буде мал тіж Михал Коцюба, котрый вюл буде кулінарны варштаты.

Орґанізаторы постарали ся тіж о выняткове закінчыня каждого дня варштатів. В пятницю на вечер в Театрі на поді буде мож обізрити спектакль Театру Мале Мі – байку для діти, а Кая Прусіновска поведе варштаты колысанок. Другого дня Катерина Яцковска-Енемуо просит на «Байкы, басні і правдивы істориі з ріжных стран, якы розгрівают серце, розясняют зимову темноту», а пак зас пройдут варштаты Каі Прусіновской разом з дітми «Золота колыска на высокій горі». Завершыньом спільного вікенду буде печыня перничків в Ізбі з пецом.

Пляны на будуче

В пляні дальшых діянь Етноцентра є презентувати ріжного рода выставы, орґанізувати розмаіты варштаты, прим. співаня ци гры на інструментах, гуляня, варіня ци ручного ремесла. В сезоні од яри до осени будут проходити потупайкы разом з професийным інструктором, а через цілый рік до Коросна будут прошены «Мастеры Традициі», котры вести будут варштаты, але тіж давати выклады. Етноцентр зрыхтувал тіж специялну оферту для шкіл, котры будут мочы брати участ в сезоновых ци цілорічных варштатах. При осередку буде діял тіж народный театр, в склад котрого вводйут головні здібны школяре коросняньской землі.

Шеруй.

О авторі

Avatar

Коментарі