Голосник

Новорічна стріча з Розтоком – фотореляция

0

В суботу, 3. лютого/фебруара 2018 р., на Малых Ґавронах недалеко Рудной прошла шторічна «Новорічна стріча з Розтоком». Подія зачала ся о 16.00 год. в сельскій світлици. 

На початок голос мал ведучий Лемківского Фольклорного Ансамблю «Розтока», Владимір Зорило, якій привитал вшыткых запрошеных гостів, серед них м.ін. настоятеля православной парохіі свв. Космы і Даміана в Студзьонках, о. Славомира Сороканича, та двох римокатолицкых священників. В подіі участ брали і ведучий Головного Заряду Стоваришыня Лемків, Андрий Копча, і секретар ГЗ СЛ, Севериян Косовскій – заєдно в роли редактора ЛЕМ.фм. Пару місяци тому в Ґавронках был покликаний новий Кружок СЛ, в склад котрого вошли м.ін. члены Розтокы. Святкувати з Розтоком пришол тіж ведучий ЛАПіТ «Кычера», Юрий Стариньскій. Присутны были і дальшы гості – радны Ґміны Рудна та директор Культурного Центру в Рудній, Бернард Лянґнер. 

Стріча зачала ся короткым концертом орґанізаторів подіі. Розтока на початку заспівала дві коляды, припоминаючы, што то такой новорічно-святочна стріча з нима. Дальше ансамбль выконал пару пісен зо свого штоденного репертуару. По короткій перерві запрезентувал ся камаратскій колектив Войцєшовянкы з Войцєшова бл. Злоторыі. Ведуча ґрупы поздоровила лемківску Розтоку з Новым Роком. З ансамбльом выступил бывший римокатолицкій парох з Ґвізданова, якій однедолга служыт як раз в Войцєшові. Дякувал він за тото, же тепло го принято, а тіж повіл, што радо споминат час, коли пробывал в Ґвізданові і околицях, а тiж же час, коли гостил серед лемківской меншыны. Священник дополнил, што были то все добры про него односины, і надіє ся, што надале так буде. 

Подію прикрашал свойом гром Ваньо Олеснєвич. До його музыкы присутны співали і гуляли. Серед гудаків, якы помедже гуляньом пригрывали гостям, был тіж роджений в 1922 році в рідній Перунці гушляр – Владимір Олеснєвич. 

Розтока заповіла, што того рока празднує свій ювілей 10-літя діяльности. З той нагоды колектив орґанізує ювілейну подію, яка пройде 28. квітня/апріля в Рудній. 

 

 

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар