Голосник

Новорічный «Говорить Пряшів» – пятниця, 20.00 год.

0
Дорогы слухачы, приятелі нашой редакциі. Так треба привитати ся з Новым Роком, повінчувати Вам вшыткого доброго, жебы тот рік был о вельо ліпшый од минулого. Новый Рік то шанса на зміны. Так, зміняти будеме ся і мы, жебы іщы ліпше выполняти свою журналистичну місию серед Лемків/Русинів.

По старому остане єдно – «Говорить Пряшів». Голос од нашых братів зза «горба» незмінно звучал буде в радию ЛЕМ.фм, кажду пятницю по 20.00 год. Очывидно за середньолемківскым часом. Так жебы сте памятали, же Лемковина ачий і вызначaт рахубу часу.

Проблемы, самы проблемы. Карпатску Русь заатакувала зима! Хто бы ся сподівал. Но, тепер сой кус кєпкуєме, але то лем зато што декотры зо зимы в Карпатах роблят якісу аномалию. А то нич чудного, же вкінци пришла і приатакувала так як колиси, як давно, як дідове повідали. Аномалиі то радше в тым світовым климаті. Природникы алярмуют, што лем 12 років ся нам лишыло, жебы сме ся іщы встигли опамятати з влияньом на отепліня…

Але не будеме більше смутити. Треба нам ся взяти до роботы, а при тым вшыткым желати вшыткого доброго – вельо силы. В нас тіж помалы вшытко іде ґу ліпшому. Маме для Вас новы пропозициі, не лем радийовых передач, але і публицистичных текстів. Вшытко єдно – все про Вас.

В днешнім проґрамі просиме зосередити ся на Припоминці про Різдво. Дальше в Книжници.фм – Данієла Капралова і «православная поезия». В Нашых целебритах – Штефан Добош, професор і літературознавця.


Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар