Голосник

Новосільскій i Двурнік до купліня

Ґрафікы Юрия Новосільского з 80. і 90. років та роботы інчых артистів буде мож купити на авкциі дому Деса Юнікум во Варшаві.

На повыставовій авкциі варшавской Десы, котра пройде 7. лютого/фебруара 2019 р., ліцитувати буде мож м.ін. серіґрафіі Юрия Новосільского, вшыткы вказуют жіночы акты. Новосільскій єст єдным з найвыдатнійшых артистів ХХ ст. в Польщы. Творчіст вмерлого в 2011 р. маларя є барз цінена і пожадана через колекцийонерів штукы. Ціны робіт Новосільского протягом остатніх 10 років штырікрат ся збільшыли.

На выставі Артистична Ґрафіка: Сучасна Штука в Салоні Деса вказуваны были ґрафічны роботы Новосільского, якы темом покрывают ся з його найпопулярнійшыма образами, м.ін. серіґрафіі Плывачкы. Артиста часто підкрислял, же цілю його малярства было зробити жену центряльном постатю, аж і обєктом культу. Вшыткы штырі ліцитуваны творы вказуют жены як раз в такым укладі. Фаребны серіґрафіі представляют упрощены фіґуры обведены чыстом ленійом контуру. Єден з актів то лем легка ленія рисунку на білым папері. Артиста был мастером синтезы, лучыл фіґурацию з абстракцийом, реальніст з сакрум, сучаніст з візантийскым іконовым малярством. Тілесніст в його штуці лучыт ся з духовом контемпляцийом.

Серіґрафіі Новосільского тішат ся великым заінтересуваньом колекцийонерів тіж зато, што сут о вельо туньшы як олійны образы артисты. За тоты треба заплатити аж і парудесят тисячів злотых, а серіґрафіі мож купити уж за близко 8 тисячів злотых. Милуного рока образ Новосільского Жены на шыфі продано в Десі за близко 1 млн зл (!).

Каталоґ ближучой ся авкциі Десы то творы знаных сучасных артистів тіж інчых напрямів, м.ін. Леона Тарасевича, Яна Тарасіна, Войцєха Фанґора ци Едварда Двурніка. Як іде про того остатнього, якій все бесідувал, што інспірацийом для него долгій час был наш Никыфор, купити буде мож дві інкоґрафіі зроблены в 40. роках минулого столітя. Ціны тых творів естимуваны сут на 2 і 3 тис зл.

Вшыткы ліцитуваны творы найдете за тым мотузком.

Фот. Юрий Новосільскій, Без наголовка (Сині жены), 1995

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі