Голосник

Общество приятелів Підкарпатьской Руси чекать вална громада

0

Як інформуе Выконный выбор Общества приятелів Підкарпатьской Руси (Společnost přátel Podkarpatské Rusi), в суботу 8-го апріля 2017-го року одбуде ся в просторах Дому народностных меншын в Празі вална громада членів.

На валній громаді будуть членове інормованы о діялности общества за минувшый період, о господаріню орґанізації, а так само собі членове выберуть новый Выконный выбор. В рамках културного порґраму на закінчіня засіданя валной громады є приготовлене і промітаня філму Яна Ціґлбауера під назвов Stráž obrany státu na Podkarpatské Rusi (Сторож обороны штату на Підкарпатьскій Руси).

Общество

Общество приятелів Підкарпатьской Руси є обчаньскым здружіньом, котре было засноване у 1990-ім році і дійствує в Чеській републіці. Окрім іншого є і членьсков орґанізаційов Світового конґреса Русинів за Чехію, было єдным із основателів конґресу. Ідейово одкликує ся на діятельность Клубу приятелів Підкарпатьской Руси, котрый быв заснованый в міджівойновім періоді в Братіславі. Цілями общества суть проглубованя односин зо жытелями і орґанізаціями Закарпатьской области Україны, бывшой Підкарпатьской Руси, підпора Русинів на теріторії Чехії ці популарізація Русинів в Чеській Републіці. Общество выдавать і часопис „Podkarpatská Rus“, но і далшы неперіодічны публікації.

Членами общества суть Русины, Чехы народжены на теріторії Підкарпатьской Руси і люди, котры мають одношіня ку тій теріторії. Членьска база має коло 500 членів із Чеськой републікы, но і далшых держав. У веджіню орґанізації поступно вычеряли ся од 1990-го року Александр Величко, Яромір Горжец, Мілослав Копецкый, Їржі Гавел, Аґата Пілатова і Даґмар Бржезінова. Моментално веде орґанізацію у фукнції председы Ян Чопик.

Сторож обороны штату

Як пишеме высше, в рамках валной громады буде ся промітати і філм, ку котрому сценарь написав публіціста і історік із Чеськых Будєйовіць Ян Ціґлбауер під назвов Stráž obrany státu na Podkarpatské Rusi, якый выникнув у 2016-ім році.

Stráž obrany státu быв озброєный елемент в Чехословакії, котрый існовав в роках 1936 – 1939. Сторож выникла наряджіньом влады ЧСР зо дня 23-го октобра 1936-го року. Головнов задачов было забезпечовати теріторіалну цілость державной граніці і непорушытельность державной теріторії ЧСР. Окрім того старала ся Сторож і о забезпечованя гражданьского порядку і о роботу повязану з цолнов справов (фінанцы). Перед заснованьом того озброєного елементу державны граніці хоронила лем фінанчна сторож, котра была ряджена Міністерством фінанцій.

В році 1938 пришло ку неєдній атаці на Сторож обороны штату, котры были зроблены членами войсковых частей Судетонімецькой партії, озбороєнцями із мадярьскых Szabadcsapatok ці Rongyos gárda, як і з україньскыма націоналістами на Подкарпатьскій Руси – січовіками. Сторож обороны штату заникла поступно по роспаді Чехословакії в марці 1939-го року.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар