Голосник

Од Руснаків в світ. 70 років тому зачало высылати Радийо з Нового Саду

Перед 70. роками, 29 листопада/новембра 1949 р. вызвучал в ефірі першый раз сиґнал радия Войводина з Нового Саду. 

Радийо Новый Сад было основане по войні, коли Русины/Лемкы во вшыткых державах східнього блоку зазнавали дискримінациі, переслідувань і примусового однародовліня. Так товды войовдиньскій парлямент принял рішыня, жебы в ден республиканьского свята 29. листопада/новембра 1949 р. запустити высыланя реґіональной радийостациі.

Од того дня зачынат ся розвиток тіж руснацкого высыланя в Сербіі. Радийо Новый Сад зачало емісию авдиций в пятьох языках: сербскохорватскым, мадярскым, словацкым, румуньскым і русиньскым. Окрем інчого, радийо Новый Сад полнило і пропаґандову функцию і мало протидіяти антиюгославяньскій пропаґанді, плынучій зо стороны радийофоній совітского блоку. Од початку функцийонуваня руской редакциі радия Новый Сад проблемом был брак професийных редакторів. Русиньска редакция емітувала товды лем музичны авдициі, а в роках 1955-1966 не емітувала русиньского проґраму.

З часом радийо Новый Сад зачало быти популярне за границьом з огляду высыланя атракцийной і популярной музикы без вводжыня ідеолоґічной прикраскы. Пропаґация радийовых волн дозваляла слухати тото радийо в цілій Европі.

Радио Новый Сад днеска веде проґрамы на трьох каналах. Першый проґрам веде ся в сербскым языку. Другый проґрам лем по мадярскы. Третій проґрам веде высыланя в 14. языках нацийоналных меншын, в тым чыслі і проґрам в рускым языку. Русиньскы проґрами радия Новый Сад мож слухати на трьох фрефенциях 92 MHz, 100 MHz і 107,1MHz, але мож і слухати радийо Навый Сад через Інтернет. Проґрамы в рускым языку мож слухати штоден, в Третім проґрамі Радия Новый Сад, рано од 06:00-08:00 год., в попудне од 12:00-14:15 год., і в ночы: в середу од 21:30-06:00 год. і в неділю од 22:30-06:00 год.

З нагоды великого ювілею Радия Новый Сад, най і лемківскому радию ЛЕМ.фм з Польщы буде дозволене передати щыры желаня: Дорогы директоры, редакторы, технікы емісиі і ціла радийова руска родино приймийте од нас подякуваня за дотеперішню Вашу роботу, за труд, за Вашу поміч, котру все сме могли од Вас достати, за підпору русиньскых медий во світі, і за Добре Слово. Жычыме вам далшых успіхів в вашій медияльній роботі. Здравиме Вас, і до почутя.

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі