Одпрезентовали моноґрафію о театралнім меморіалі

У віторок 11-го децембра 2018-го року в Домі културы в Руськім Керестурі была одпрезентована недавно выдрукована моноґрафія Дюры Латяка під назвов 50 роки Драмского мемориялу Петра Ризнича Дядї (50 років Драматічного меморіалу Петра Різнича Дяді) за участи автора.

Як інформовала аґентура Рутенпрес, в мені єдного із выдавателів – Дому културы, його директор Йоакім Рац подяковав Міністерству културы Сербії, котре фінанчно допомогло выданю, як і вшыткым, котры будьякым способом підтримали тоту публікацію, яка вышла із нагоды округлой річніці заснованя того театралного фестівалу.

Маєме надію, же театер ся утримле

О значіню той моноґрафії за Завод про културу войводиньскых Русинів бісідовала його директорка Анамарія Ранковіч, о моноґрафії і обставинах, в якых подарило ся єй зробити зясь бісідовав сам автор Дюра Латяк.

„Театрална діялность, покля ся не запише, як кебы єй ани не было. В тім контексті і тота книжка має велику вартость про наш театралный жывот, о котрім собі думаме, же ся утримле і надалше, і при вшыткых тяжкостях,“ повів Латяк.

Презентація новой моноґрафії має за інформаціями аґентуры Рутенпрес одбыти ся іщі і в Новім Саді. Публікація ся не буде продавати, выдавателі єй хотять роздати театралным діятелям і културно-умелецькым обществам, як і далшым інштітуціям.

Драматічный меморіал Петра Різнича Дяді

Театралный фестівал, котрый шторік орґанізують войводиньскы Русины в Руськім Керестурі свій округлый юбілей зоснованя святковав на ярь того року. Фестівал має все у проґрамі пєсы домашніх, войводиньскых театрів і театрланых ґруп, нераз на фестівалі брав участь і Театер Александра Духновіча з Пряшова, як єдиный професіоналный русиньскый театер у світі. Почас фестівалу проходять і різны діскусії ці бісіды о русиньскім театралнім жывоті.

Петро Різнич Дядя, котрому є меморіал присвяченый быв актором, режісером, педаґоґом і културно-освітнім діятельом серед Русинів у Войводині. О театер зачав інтересовати ся іщі на ґімназії, котру абсолвовав на Україні, в части, котра належала Російскій імперії, де ся народив. В 1919-ім році переселив ся до міста Старый Вербас і зачав орґанізовати драматічны кружкы серед войводиньскых Русинів. Театралны пєсы зачав робити в Руськім Керестурі, Коцурі, но і в іншых центрах русиньского неселіня. У 1933-ім році засновав у Вербасі театер Руска драма. По Другій світовій войні ся переселив до Руського Керестура, де передавав лекції російского языка, но засновав там і драматічный і фолклорный ансамбель. У 1948-ім році засновав першый русиньскый аматерьскый театер і о два рокы пізніше і ляльковый театер. Його мену суть присвячены як споминаный меморіал, так і Руськый народный театер Дядя.

Жрідло фотоґрафії: Рутенпрес.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Повязаны дописы

Польковиці 103,8 МHz
Ґорлиці 106,6 MHz