Голосник

Памят про Юрия Новосільского

21. лютого/фебруара 2016 р. минуло 5 років од смерти єдного з найвызначнійшых лемківскых атристів, філософів і теолоґів – Юрия Новосільского. Тота річниця была одзначена і Стоваришыньом Руска Бурса. В чест великого Лемка, на Раковицкым теметові в Кракові репрезентация заряду, з предсідательом общества – Павлом Малецкым, поклала квітя і запалила свічку на його гробі.

Юрий Новосільскій народил ся 7. січня/януара 1923 р. в Кракові в родині лемківского походжыня, котра за роботом пришла до міста, але перше жыла в селі Одрехова, недалеко Санока. Малярскы академічны студиі Юрий Новосільскій робил надзвычайні долго. Почал іх за німецкой окупациі в 1940 р., пак од 1945 р. продолжал, жебы закінчыти іх аж в 1961 році. Дале остал професором краківской Академіі Куншту. Малювал акты, натурморты, пейзажы, але найшырше знане єст його іконописаня В пятдесятых роках творил розписы в чысленных римокатолицкых і православных храмах. Постепенно охабил світску тематыку і занял ся выключні сакральном штуком. Почал быти знаний як вызначний християньскій теолоґ і філософ.

Юрий Новосільскій отримал званя доктора honoris causa Ягайлоньского Університету в Кракові та чысленны нагороды і державны одзначыня. Все зазначал свій лемківскій рід.

Павльо Малецкій на гробі Юрия Новосільского

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі