Голосник

Перша Дама в Нюйоркскій Публичній Бібліотеці

Др Богдан Горбаль, родак жыючый в Ню Йорку, вюл Першу Даму Польской Республикы, Аґату Корнгаузер-Дуду, по Нюйоркскій Публичній Бібліотеці (New York Public Library). Інформувал о тым офіцияльный сайт президента Польской Республикы – www.prezydent.pl.

В середу, 25. вересня/септембра 2019 рока, Перша Дама обізрила в Нюйоркскій Публичній Бібліотеці колекцию славяньскых і східньоевропейскых книг. Нюйоркска Бібліотека находит ся серед найважнійшых науково-дослідничых бібліотек в Зъєднаных Штатах Америкы, є тіж єдном з найбільшых публичных бібліотек на світі.

Аґата Корнгаузер-Дуда, окрем того, же зазнаємила ся з самым будинком бібліотекы та з колекциями славяньскых і східньоевропейскых книг, бесідувала з куратотом выставы, др. Богданом Горбальом, про стан чытаня в Зъєднаных Штатах Америкы. Гварили тіж про діяня, што підниманы сут і в Польщы, і в ЗША, котрых задачом є збільшыня чытальничой свідомости серед діти і молодежы. Польска Президентска Пара каждый рік влучат ся в загальнопольску акцию Нацийонального Чытаня, а Перша Дама влучат ся в розмаіты діяня промуючы чытаня.

Др Богдан Гобраль в Нюйоркскій Публичній Бібліотеці робит од 1997 рока. Є Директором Технічного Перетваряня Науковой, Промысловой і Бізнесовой Части Нюйоркской Бібліотекы (Head of Technical Processing at NYPL’s Science, Industry and Business Library) та Куратором Славяньскых і Східньоевропейскых Колекций Бібліотекы. Вродил і выховал ся в Польщы, але од 1990 рока жыє в Ню Йорку. Є істориком і бібліотекарьом, абсольвентом Вроцлавского Університету та Queens College в Ню Йорку. Занимат ся русиньском історийом та політичныма трансформациями Лемків в Европі і Пілнічній Америці.

Фот. www.prezydent.pl

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі