Голосник

Підкарпатскє воєвідство і пряшівскій край з дофінансуваньом на дороговы інвестициі

0

В минулым тыжни, 18. квітня/апріля 2018 р., самоуряды підкарпатского воєвідства і пряшівского краю підписали партнерскє догваріня, в рамках котрого має быти побудуваний м.ін. новий фраґмент воєвідской дорогы но. 992 в Яслі. Інвестиция буде дофінансувана в квоті 3 млн евро з проґраму Польща-Словация.

Догваріня было підписане вчас робочого посіджыня польско-словацкой робочой ґрупы дс. приграничной спілпрацы місцевого самоурядуваня.

Не лем обітниці, але реальна спілпраца

Маршалок підкарпатского воєвідства Владислав Ортиль підкрислил вчас стрічы, што барз ся тішыт з підписаня догваріня медже реґіонами. Припомнул, што про рішыня о реалізациі проєкту бесідувано на попереднім посіджыню робочой ґрупы. А днес сут уж факты і підписуєме догваріня – додал.

Председа пряшівского краю Мілан Маєрскій повіл, што спілпраца медже обома реґіонами не кінчыт ся на деклярациях, але є реальна і діє на хосен люди. Як примір подал автобусовы получыня зо Словациі на летовиско в Ряшові, котры скомунікуваны будут з льотами до Ню Йорка.

Зо Свидника на Лемковину

Присутний на стрічы директор заряду і утриманя реґіональных доріг пряшівского краю Петер Коціско повіл, же завдякы підписаному догваріню жытелям Свидника буде легше доіхати в околиці Бардийова, а пізнійше в страну Нижньой Полянкы і польской границі, а дале через лемківскы села до Ясла.

То буде добрий проєкт не лем для нашых жытелів, але тіж для жытелів підкарпатского воєвідства і польскых повітів. Жытелі Ясла будут мати легший доізд до уздоровискового міста Бардиів ци до Свидника і дале в глубину Словациі – зазначыл Коціско.

Зас директор підкарпатского заряду воєвідскых доріг в Ряшові Пьотр Міонсо додал, што по польскій страні побудуваний буде новий одтинок воєвідской дорогы но. 992. Выведе він рух з центра Ясла в страну Словациі.

В рамках проєкту по словацкій страні выремонтуваны будут два одтинкы. Перший на дорозі 3490 Раславиці – Лопухів – Стуляны, де заплянувано м.ін. ремонт скрижуваня в місцевости Раславиці. На дорозі 3500 Стуляны – Кукова плянуваний є м.ін. ремонт двох мостів в селах Дуковці – Зельмановці та в селі Кукова.

Неодолга оголошений буде конкурс оферт на переведіня плянуваных робіт.

фот. материялы Міністерства Інфраструктуры

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар