Голосник

По нашому – фотоґрафічный конкурс

Іщы до 10. жолтня/октобра 2019 р. мож присылати знимкы в фотоґрафічным конкурсі орґанізуваным в рамках проєкту RISE COLING. В конкурсі можут брати участ вшыткы, без віковых ограничынь, особливі молодіж. До выграня професийный, фотоґрафічный наплечник (його вартіст то коло 500 зл), зовнішній диск 1ТБ та карты памяти.

Знимкы мают односити ся до темы язык меншын. Орґанізаторы заохочуют, жебы через фотоґрафіі выразити емоциі звязаны з материньскым, меншыновым языком ци языком, котрый є загороженый. Мож прислати пару знимок до выбраных катеґорий (по єдній до поєдной катеґориі) або по єдній знимці до каждой катеґориі.

Катеґориі конкурсу то:

  1. Я, Чловек: фотоґрафічны портреты. В описі треба оповісти, кого вказує знимка і чом дана особа є важна для соспільности.
  2. Моі слова – мій світ: наголовок знимкы повинен ся зосереджати на єдным конкретным слові в языку меншыны. Сам образ може дослівно, метафоричні ци даяк артистичні вказувати выбране слово. В описі до знимкы треба пояснити значыня слова, контекст, а тіж значыня для меншыны. Примір: моім улюбленым словом в калабрисийскым діалекті грецкого языка єст cucciamata, што означат дозрілый овоч, котрый іщы не был зорваный, зато знимка представлят місцеве оливне дерево з дозрілыма оливками, котры неодогла будут зобраны.
  3. Звукы нашых душ: знимкы повинны вказувати розмаіты артистичны выступы, представляючы культуру даной меншыны (танец, музика, поезия, театр, образы та інчы). В описі треба пояснити, што то за перформанс і чом є важный для меншыны.
  4. Натуральні!: фотоґрафічный образ звязків медже чловеком а натуром. Можут то быти краєвиды, рослины або звірята. В описі треба пояснити, в якій спосіб сут они важны для культуры даной меншыны.
  5. Рух: знимкы, котры реєструют зміны в культурі або рух люди в просторі або часі. Примір: мож прислати знимку міґруючой соспільности або даку інновацию в культурных практиках.

Конкурс орґанізуваный є Варшавскым Університетом. Полный реґулямін і технічны вымаганя тыкаючы высыланых знимок находят ся на сайті конкурсу.

Результаты конкурсу будут оголошены 25. жолтня/октобра тр. на конкурсовым сайті. Фотоґрафіі фіналистів і выріжненых вказанут будут вчас Тыжня Языковой Ріжнорідности в Варшаві, котрый буде проходил од 27. листопада/новембра до 1. грудня/децембра тр.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі