Політічне українство

0

Од 24-го до 26-го авґуста проходить у Львові VI. конґрес тзв. „Світової Федерації Українських Лемківських  Об’єднань“. Не мож не схосновати тоту принагоду на поздоровліня той орґанізації, кідьже і она о наш русиньскый рух нераз проявила „інтерес“.

Не будеме споминати вшытко тото, што односно нашых орґанізацій на каждім кроці бісідує голова споминаной федерації Софія Федина, котра має з Лемками може тілько, што я із монґолскыма пастырями овець. Нераз сьме уж од ньой чули, якы сьме планы, якы сьме промосковскы, хто нас платить і чого тото робиме. В памяти нам навсе зістане, же їй реакція на Світовый конґрес Русинів в році 2013, котрый проходив на Україні, была в подобі кликаня по СБУ, жебы нашы орґанізації україньска беспека рішыла, бо сьме тото найнебезпечніше на цілім світі. На вшыткы тоты темы бы ся вже якбач дали писати окремы діпломовы роботы, мінімално із псіхолоґії. Голова федерації бы бізовно была інтересный обєкт досліджіня. Но мы заміряме ся лем на єдно. І то, же Софіа Федина все, кідь є бісіда о Русинах, говорить, так як і далшы проукраїньскы діятелі, о тзв. політічнім русинстві. Лемже, хто є властно політічный?

Не будеме ся смотрити, на яку історію свойой орґанізації одкликує ся СФУЛО, а спомянеме факт, же СФУЛО, так як тоту федерацію знаєме днесь, з тов назвов, існує од року 1997. Зъєдинили ся в ній тзв. лемківско-україньскы або русиньско-україньскы орґанізації із дакілько держав і Федина все акцентує, же то україньска федерація, же Лемкы, Русины, то суть Українці, же орґанізації в СФУЛО підтримують Україну, докінця же СФУЛО помагать воякам АТО ітд. Окрім єдной членьской орґанізації суть вшыткы остатні орґанізаціями „україньской діаспоры“, значіть україньскыма орґанізаціями, котры діють мімо теріторії Україны.

Вопрос є теперь такый. Нашто было в році 1997 засновати СФУЛО, і чом ся радше тоты орґанізації не стали членами втогды уж існуючого Світового конґресу Українців? Тадь то так само орґанізація, котра зъєдинять українськы орґанізації в діаспорі, так само суть то Українці, котры єй творять, так само чествує україньску державу, робить на благо свого народа по цілім світі…

Думам, же над одповідьов не є треба барз довго думати. Залучіньом ся тых орґанізацій, котры днесь творять СФУЛО, до Світового конґресу Українців, бы тоты орґанізації стратили часть, а то тоту найголовнішу, свойой аґенды. Бо они не суть першорядо Українцями, а они суть першорядо українізаторами. Різніця в тім є велика. Покля є хтось, або ся чує быти, Українцьом, хоче розвивати свою културу, народностный жывот в діаспорі, і не мішать ся іншым до капусты, проти того чоловік не може нич мати. Но покля іде о українізацію, пак з тым не мож быти согласным. Зато, же їм іде о українізацію, не можуть быти лем в даякім конґресі Українців, де ся не споминають Лемкы або Русины в назві.

Русинство є політічным лем в тій мірі, покля приголошіня ся ку даякому народу є політіков. В тім припаді о нич веце русинство політічным не є, як є політічным приголошіня ся ку будякому іншому народу. Што є досправды політічне, то є українство.

Тота форма українства, котру нам репрезентують тзв. лемківско-україньскы або русиньско-україньскы орґанізації зъєдинены під СФУЛО. Українство, котре є першорядо українізаційов іншого народа. Котре є резултатом політічного рішіня більшевіцького Кремля, котре было насилно запроваджане головно по Другій світовій войні, і є успішно продовжоване никым іншым, лем декомунізуючов ся Українов і їй колеґами в українізачных орґанізаціях за граніцями Україны. Гей, тото є досправдова політіка: не давати право іншому народу, не признати го, очорньовати го, кликати на нього беспекы. Політіков не є свободно ся голосити ку свому народу, хотіти розвивати свій язык, културу, хотіти нормално існосвати серед іншых народів, котры так само чествуєме.

Може знова раз на конґресі одзвучать слова і о русиньскім русі. Може знова раз Софія Федина з колеґами схоснує можливость, жебы коментовати і возродный рух іншого народа, якым ся декларують быти они. І може знова раз пак о тім холем тыждень і пів будуть писати різны україньскы порталы. О тім, же СФУЛО ся од нас діштанцує (Богу дяковати), і так далше, і так далше. І може міджі вшыткыма тыма пустыма словами будуть і тоты дві повязаны в їх очах з нами – політічне русинство. І то буде лем далшым потверджіньом єдного. Же орґанізації зъєдинены у федерації, як і ціле СФУЛО, не є нич інше, лем політічне українство.

(Статя была написана як коментарь „Вступне до контроли“ лемківского радіа lem.fm.)

Жрідло фотоґрафії: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Share.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.