Голосник

Помочі деревяным храмам хотять навчаньом старых ремесел

Ремеслами повязаныма з деревянов сакралнов архітектуров хоче безпрофітова орґанізація Карпатьскы деревяны церьвки (Karpatské derevené cerkvi, n.o.) із центром в Снині свойпомічно утримовати деревяны храмы в Сниньскім і Собранецькім окресі.

Ожывліня традічного шындлярьства, іконпису і свічкарьства може так само подля слов Мірослава Бураля із споминаной орґанізації помочі турістічному руху в єнім з менше розвитых реґіонів на Словакії. Першый курз іконопису в Стащіні проходив почас попереднього вікенду. Інформовала о тім аґентура TASR.

Мобілный варсштат

„Актуално робиме продовжіня проєкту, почас котрого сьме інвентарізовали ремесла в сниньскім реґіоні подля села і ремесел. Нашым першорядым цільом суть ремесла, котры суть повязаны із сакралнов архітектуров. Хочеме ся выбавити, презентовати, але і мати то приготовлене так, жебы годны сьме быти мобілны і утримовати деревяны храмы. Подля ‚гесла превенція утримованьом‘ не зохабити памяткы упадати,“ повів про аґнетуру о головных цілях орґанізації Бураль.

Представа є така, жебы зрядити мобілный варсштат, котрый бы в реґуларных інтервалах навщівльовав села, в котрых суть деревяны церьковці, і могли ся зробити малы потрібны оправы прямо на місці.

Навчіти традічны ремесла

Як Бураль про аґентуру доповнив, секундарным цільом проєкту є навчіти містных жытелів традічны ремесла, котры бы годны были хосновати як турістічну атракцію. Якраз писаня ікон є подля нього атрактівне.

Жебы были іконы штонайвеце автентічны, і на першім із серії трьох курзів, котры Карпатьскы деревяны церькви планують до кінця марца 2020-го року зреалізовати, хосновали участны темперу з яєць. „Хочеме, жебы то была яєчна темпера, значіть тота первістна, котра ту была, і писати або продуковати іконы нашой провенієнції,“ пояснив Бураль.

Почас вікенду в Стащіні участны першого курзу, під веджіньом лекторькы Ядвіґы Денісюковой із Польщі, котра пише іконы подля церьковного канону, писали ікону Манділіон, котра походить із села Луків – Венеція. Ікона є моментално в Словацькій народній ґалерії в Братіславі.

По реконштрукціях освіта

Безпрофітова орґанізація Карпатьскы деревяны церькви зачала освітньов і навчалнов діялностьов занимати ся по серії успішных реконштрукцій деревяных храмів у сниньскім і собранецькім реґіоні, котру реалізовала в роках 2014 аж 2016.

Як інформовав Мірослав Бураль, того часу тоты актівности будуть годны реалізовати в части будовы в Стащіні, котра має быти в будучности музейом. Актівности орґанізація реалізує в рамках проєкту „Ожывліня традічных ремесел на Земпліні“, котрый быв підпореный з проґраму реґіоналного розвитку Уряду підпредсидателя влады Словацькой републікы про інвестіції і інформатізацію.

Жрідло фотоґрафії: Karpatské drevené cerkvi, n.o.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі