Голосник

Правда перемагать!

В тот день, 28-го октобра собі і Русины в Чехії, на Словакії і на Україні припоминають 95 років од заснованя 1. Чеськословенськой републикы. Сучастьов той републикы ся по їднанях стала і Підкарпатьска Русь, дідовизна Русинів. Русины ся так стали державотворным народом.

По войні была тота теріторія насилно приєднана к Совєтьскій Україні. По роспаді Совєтьского союзу Русины не хотіли розбивати нововыникнуту незалежну Україну, але демократічно, референдумом, котре выголосила Україна, выразили, же хотять жыти в рамках Україны з властнов автономійов. Доднесь тот референдум Україна неакцептує, хоць го выголосила сама. Доднесь Україна не вызнала ани Русиньску народность як окрему народность.

Покля ся днесь в демократічній Европі обгаюють права декого, веце як двацятьрічне порушованя основных прав чоловіка і демократічных прінціпів в одношіню к Русинам Европа не видить. І не видить то ани Чехська ці Словацька републикы, котры могли выникнути і вдяка державі, яку засновали вєдно з Русинами. Надійов Русинам няй буде мотто державного ербу той першой републикы: Pravda vítězí. Правда перемагать!

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі