Голосник

Православны і грекокатоликы підут на Святу Гору Явір

0
В липци/юлию орґанізуваны сут православныма і грекокатоликами поломництва на Святу Гору Явір. Того рока пройде уж 28. православне поломництво до того святого місця Лемковины. Од парох років путуют тіж вірны грекокатолицкой Церкви.

Православны путуют на праздник свв. Петра і Павла

Православне поломництво традицийно заплянуване є перед праздником свв. первоверховных апостолів Петра і Павла, котре выпадат 12. липця/юлия. Од років православна Церков на Лемковині в тот ден правит богослужыня на Святій Горі Явір. Поломникы зачнут свою духову подорож в віторок, 10. липця/юлия, о 9.00 молитвом в церкви в Перегримці, пак підут ґу Бортному. Другого дня заплянувано перехід з Бортного через Ґладышів до Ганчовы.

В праздник свв. Петра і Павла по 7.00 год. рано поломникы выйдут з Ганчовы до Высовы, де при місцевій церкви будут витаны єрархы. Наперед Божеской Літургіі буде посвячена вода і крест од православной молодежы. Богослужыня пройдут на ділянці належній ПАПЦ, під розставленым шатром. Орґазнізатором поломництва є Братство Православной Молодежы перемышльско-ґорлицкой єпархіі.

Особы маючы дяку брати участ в поломництві прошены сут о контакт до Мариі Феленчак під но. 514 768 263. Духову опіку над поломниками тримати будут оо. Юлиян Феленчак з Морохова, Мирослав Цідило з Бортного, Марко Ґоцко з Команчы та Ярослав Ґрыч з Ґорлиц. Орґанізаторы забезпечают ідло, спаня і транспорт пакунків.

Грекокатолицкє поломництво тыжден пізнійше

Тогорічне поломництво орґанізуване грекокатолицком Церквю зачне ся 18. липця/юлия богослужыньом в храмі в Креници, одкале пак поломникы выйдут через Мохначку ґу Баници. Наступного дня вірны підут через Ізбы, Біличну, Ріпкы до Ганчовы. 20. липця/юлия поломникы по год. 7.30 підут од рільничой школы в Ганчові в сторону Высовы, а дале на Святу Гору Явір. На місци о год. 9.30 правлений буде молебен до Пресвятой Богородиці, а пак архієрейска Служба Божа.

Орґанізаторы забезпечают м.ін. духову опіку, ідло, нічліг, транспорт баґажів. По поломництві буде зберана офіра на покрытя його коштів. Більше інформаций мож чытати на сайті веденым в русиньскым языку. Деталі будут выявлены в липци/юлию на приведеным сайті.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар