Голосник

Председа парламенту бы дав Русинам депутата

0

Председа Народной рады Словацькой републікы Андрей Данко 2-го септембра 2016-го року навщівив румуньску Орадеу, де ся стрітнув із румуньскыма Словаками. Інформовала о тім словацька державна пресова аґентура TASR.

За словами Данка, котрый є єдночасно і председом Словацькой націоналной партії (Slovenská národná strana), Словакія при тім, яку має днесь владу, може быти прикладом в комунікації державотворного народа і народностной меншыны. Данкова партія, котра была під минулым веджіньом Яна Слоты спринимана як протимадярьска і протиромска, є днесь во владі зо соціалнодемократічнов партійов SMER-SD Роберта Фіца і словацько-мадярьсков партійов MOST-HÍD Белы Буґара, за котру кандідовало і дакілько Русинів.

„Є про мене величезнов жывотнов скушеностьов быти во владі з председом партії належаючой меншыні. Кідь не буде стояти коло себе Мадярь, Словак, Румун, Поляк, Чех, в рамках Европской унії не будеме значіти нич. Єдина путь є здолавати розділности і комуніковати,“ повів в Орадеї Данко.

Депутата Русинам

Данко є пересвідченый о тім, же Словацька републіка має взорове одношіня ку народностным меншынам, і кідь є все што зліпшовати. Председови словацького парламенту ся любить і румуньскый модел, на котрый подля нього треба памятати.

„Вісемнадцять румуньскых депутатів є автоматічно з народностных меншын. Я бы ся не боронив ани в нас, жебы холем Русины, або і іншы народностны меншыны, мали автоматічно мінімално єдного депутата,“ выголосив Андрей Данко.

Припомяньме, же хоць Словацька републіка підпорує културу народностных меншын і меншынове школство, на Словакії доднесь не є принятый закон о народностных меншынах ани о їх фінанцованю. Модел фінанцованя ся так може хоцьколи мінити. Пропозіцію закона о народностных меншынах, в котрій є обсягнутый і модел фінанцованя ці вытворіня меншыновых самосправовань, выпрацовав Округлый стіл Русинів Словеньска, котрый го дав до діскузії далшым народностным меншынам на Словакії. Цільом є найти політічну підпору про протиснутя такого закона в парламенті.

Інша реторіка

Председа парламенту і Словацькой націоналной партії од вступу до коаліції з партійов MOST-HÍD змінив реторіку.

Іщі у 2014-році му перешкаджала як партія Белы Буґара, так і Округлый стіл Русинів Словеньска (ОСРС). Перед комуналныма выборами в октобрі 2014-го року в єдній із телевізных діскузій повів, же актівности ОСРС повязаны з пожадавками принятя закона о народностных меншынах і вытворіньом народностных самосправовань, суть сполупрацов Русинів з Буґаровов партійов MOST-HÍD. Вытворіня народностных самосправ дезінтерпретовав як намагы теріторіалных автономій.

ОСРС ся діштанцовав од слов Данка, як і од того, же співпрацує із будьяков політічнов партійов. Так само ся ОСРС діштанцовав од того, же хоче будьяку теріторіалну автономію. Днесь Андрей Данко не має проблем з депутатами, котры бы были в парламенті лем на основі того, же бы заступали народностну меншыну, што є так само форма народностного самосправованя.

Жрідло фотоґрафії: aktuality.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Председа парламенту бы дав Русинам депутата

0

Председа Народной рады Словацькой републікы Андрей Данко 2-го септембра 2016-го року навщівив румуньску Орадеу, де ся стрітнув із румуньскыма Словаками. Інформовала о тім словацька державна пресова аґентура TASR.

За словами Данка, котрый є єдночасно і председом Словацькой націоналной партії (Slovenská národná strana), Словакія при тім, яку має днесь владу, може быти прикладом в комунікації державотворного народа і народностной меншыны. Данкова партія, котра была під минулым веджіньом Яна Слоты спринимана як протимадярьска і протиромска, є днесь во владі зо соціалнодемократічнов партійов SMER-SD Роберта Фіца і словацько-мадярьсков партійов MOST-HÍD Белы Буґара, за котру кандідовало і дакілько Русинів.

„Є про мене величезнов жывотнов скушеностьов быти во владі з председом партії належаючой меншыні. Кідь не буде стояти коло себе Мадярь, Словак, Румун, Поляк, Чех, в рамках Европской унії не будеме значіти нич. Єдина путь є здолавати розділности і комуніковати,“ повів в Орадеї Данко.

Депутата Русинам

Данко є пересвідченый о тім, же Словацька републіка має взорове одношіня ку народностным меншынам, і кідь є все што зліпшовати. Председови словацького парламенту ся любить і румуньскый модел, на котрый подля нього треба памятати.

„Вісемнадцять румуньскых депутатів є автоматічно з народностных меншын. Я бы ся не боронив ани в нас, жебы холем Русины, або і іншы народностны меншыны, мали автоматічно мінімално єдного депутата,“ выголосив Андрей Данко.

Припомяньме, же хоць Словацька републіка підпорує културу народностных меншын і меншынове школство, на Словакії доднесь не є принятый закон о народностных меншынах ани о їх фінанцованю. Модел фінанцованя ся так може хоцьколи мінити. Пропозіцію закона о народностных меншынах, в котрій є обсягнутый і модел фінанцованя ці вытворіня меншыновых самосправовань, выпрацовав Округлый стіл Русинів Словеньска, котрый го дав до діскузії далшым народностным меншынам на Словакії. Цільом є найти політічну підпору про протиснутя такого закона в парламенті.

Інша реторіка

Председа парламенту і Словацькой націоналной партії од вступу до коаліції з партійов MOST-HÍD змінив реторіку.

Іщі у 2014-році му перешкаджала як партія Белы Буґара, так і Округлый стіл Русинів Словеньска (ОСРС). Перед комуналныма выборами в октобрі 2014-го року в єдній із телевізных діскузій повів, же актівности ОСРС повязаны з пожадавками принятя закона о народностных меншынах і вытворіньом народностных самосправовань, суть сполупрацов Русинів з Буґаровов партійов MOST-HÍD. Вытворіня народностных самосправ дезінтерпретовав як намагы теріторіалных автономій.

ОСРС ся діштанцовав од слов Данка, як і од того, же співпрацує із будьяков політічнов партійов. Так само ся ОСРС діштанцовав од того, же хоче будьяку теріторіалну автономію. Днесь Андрей Данко не має проблем з депутатами, котры бы были в парламенті лем на основі того, же бы заступали народностну меншыну, што є так само форма народностного самосправованя.

Жрідло фотоґрафії: aktuality.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар