Голосник

Президент стрітил ся з представниками ріжных віроісповідань та нацийональных і етнічных меншын

0
В пятницю, 18. січня/януара 2019 р., в президентскым палаци в Варшаві Президент Польской Республикы Анджей Дуда гостил представників вшыткых головных реліґій і віроісповідань та репрезентантів нацийональных і етнічных меншын, інформувал о тым офіцияльный сайт президентской канцеляриі.

Стріча была продолжыньом доброй традициі новорічных стріч з представниками віроісповідань і меншын, якы одбывают ся шторік в Варшаві. Попри ріжницях в вірі і етнічным походжыню твориме нацийональну спільноту польской землі – бесідувал вчас стрічы А. Дуда.

Президент выразил дяку, што о єдным часі годны зыйти ся вшыткы разом. Дал притиск, што такы стрічы сут основным елементом істнуваня польской спільноты. А. Дуда звернул увагу, што є то тіж нагода вказати, што ціла польска спільнота є розмаіта, што велика є традиция громадян Польской Республикы, якы жыют в ній од століт, а тіж часто долше.

А. Дуда навязал і до траґічной смерти Президента Ґданьска Павла Адамовіча. Через драматичны подіі зас одродила ся в нас бесіда на тему того, ци границі меджелюдскых реляций, внутрішніх, в декотрых напрямах, головно в тых політичных, не сут в нас перекрачаны. Оцінил, што подля него, границі сут перекрачаны, але не в вымірі реліґійным, нацийональным ци етнінчым, але в «меджеплемінным» – поділу на всякого рода ідеолоґічны погляды і являючы ся на іх фоні свары.

Президент ПР дал притиск на потребу діалоґу медже костелами і віроісповіданями. Як примір подал діалоґ ведений в рамках Польской Екуменічной Рады. Зазначыл, што костелы і віроісповіданьовы звязкы, люде віры годны сут сісти попри собі, не ображаючы єден другого. Проголосил дяку, штобы спільнота люди, прожываючых на польскій земли, маюча ріжны погляды, навчыла ся бесідувати зо собом в духу взаімной пошаны. При кінци свого выступліня президент А. Дуда передал новорічны вінчуваня.

На новорічну стрічу в президентскым палаци запрошены были єрархы римокатолицкого Костела, представникы жыдівской та мусульманьской спільнот, єрархы і вірны костелів соєднаных в Польскій Екуменічній Раді, войсковы єрархы: Католицкого Ординарияту Войска Польского, Православного Ординарияту Войска Польского та Євангелицкого Войскового Душпастырства. Пристуны были тіж представникы Пятидесятників, Костела Адвентистів Семого Дня, репрезентанты Алиянсу Євангеличного в ПР.

Окрем представників віроісповідань на стрічу пришли і репрезентанты нацийональных і етнінчых меншын, якы засідают в Спільній Комісиі Уряду та Нацийональных і Етнічных Меншын. Од імене меншыновой стороны СКУНіМ голос мал Григорий Куприянович з украіньской меншыны, спілведучый комісиі.

фот. www.prezydent.pl / Ґжеґож Якубовскій

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар