Голосник

Проґрам Театру Александра Духновіча в Пряшові на місяць октобер 2019

Приносиме вам проґрам Театру Александра Духновіча в Пряшові на місяць октобер 2019-го року.
2-го октобра 2019

Домашнє гніздо (Велика сцена, 19.00 год.)

Комедія о нас і справах, котры нас роблять тым, кым сьме: нашых родічах, нашых любвах, нашых несповненых снах і о тых, котры наповнили ся, хоць сьме ани не надіяли ся на тото, о надії – бо будьяк кліше і спрофанована є, все вмерать послідня, ці ся нам то любить, ці ніт. Комедія нелем о Русинах і Выході, а о каждім (і про каждого), хто колись мусив вернути ся домів, хто колись з дому хотів втечі, хто даколи у своїм жывоті холем на даякый час став частьов даякого домова і взяв на себе дакотру роль: родіча, дітины, сородника, мужа…

3-го октобра 2019

Златый ключік (Велика сцена, 9.30 год.)

Буратіно, головный герой приповідкы Алексія Толстого Златый ключік або Буратіновы авантуры, то жываньска, непослухняна і неконечно зведава, но наперек тому сімпатічна деревяна лялька із довгым носом, котрый як кібы быв на тото, жебы го маїтель пхав там, де не треба. Буратіно має ніс, котрый вынюхать кажду авантуру, небезпеку, но і способ, як із того добрі выйти, і не лем то – поможе му найти то, по чім вшыткы тужыме – златый ключік, котрым дають ся одкрыти двері до щастливого жывота… 

9-го октобра 2019

Окресный шпыталь (Велика сцена, 19.00 год.)

Чоловік ся ани не сподівать і зразу ся дізнать, в якім жыє маразмі. Невыразно то припоминать шаленый дім. Має лем дві можливости! Сплынути з оточіньом, або спробовати дістати ся вонка. Є дакілько драг: зміна індентічности, еміґрація, і кедь нереална, так холем до свого внутра. Можливость не прияти жывот є основов, но не найприємнішов. Умерти на старобу, хоць є природне, но хто бы так довго чекав… Револуція? Може, але має смысел револуція в шаленім домі?

18-го октобра 2019

Познатый непознатый (Homo sapiens) (Велика сцена, 19.00 год., 1-ша премєра)

Homo sapiens, чоловік розумный, як сьме самы себе пышно назвали, є безпохыбно найнасилнішым сотворіньом на планеті. Докажеме єй іщі уратовати? Докажеме уратовати самых себе, кедь ани зданя не маєме, хто сьме? На основі чого вырішуєме? Одкыль і де крачаме? Насилство нас проводить од початку і не здасть ся, же бы ся рихтовало счезнути. Насилство лежыть в сердці людьской културы і в сердці каждого єдного з нас. Были бы сьме то іщі все мы – без насилства? Без културы? Без жертв? Без священого? І хочеме досправды знати правду?

23-го октобра 2019

Познатый непознатый (Homo sapiens) (Велика сцена, 19.00 год., 2-га премєра) 

30-го октобра 2019

Обіцянкы (Велика сцена, 19.00 год.)

Театер Александра Духновіча пєсов Тайовского Обіцянок має намагу надвязати на драматурґічну лінію обявного інсценованя словацькых класічных творів у русиньскім културнім контексті, в режійнім наштудованю Матуша Ольгы. Тайовскый пєсу написав у 1898-ім році і выдав єй за властны грошы, жебы в часі мадярізації дав словацькым охотникам пєсу в материньскім языку, котру бы могли зробити і в рамках скормных условій. Днесь театер посередництвом того тексту хоче публіці демонштровати театралну інсценацію як твориву роботу інсценаторів.


Выступліня ТАД мімо Пряшів
4-го октобра 2019

Фараоны (Културный дім Шуміяц, 17.00 год.)

Фунґованя колхозу, в котрім панують класічны стереотіпы о діліню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і навспак. Што ся стане, кедь хлопи – функціонарі, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

5-го октобра 2019

Фараоны (Културный дім Велькроп, 15.00 год.) 

6-го октобра 2019

Обіцянкы (Културный дім Гунківці, 17.00 год.) 

8-го октобра 2019

Обіцянкы (Културный дім Стропків, 19.00 год.)

10-го октобра 2019

Тяпаковці (Културный дім Свідник, 9.00 год.)

Дія славной драматізації прозаічной предлогы вызначной словацькой писателькы з епохы крітічного реалізму Божены Сланчіковой – Тімравы вас перенесе до минулости, на село, до дому великой родины Тяпаковців, котра є прославлена тым, же є лінива і не має дяку будьшто робити. Інсценація жыво, з легкостьов, забавно але з ідейнов глубков підкреслює потребу освободити ся од наносів минулости на благо будучности, котра ся основать на старых пілірах, но не сміє їх зохабити цалком спустнути. Жывот ся мусить жыти!

12-го октобра 2019

Фараоны (Културный дім Руська Кайня, 17.00 год.)

13-го октобра 2019

Фараоны (Културный дім Вышня Ольшава, 15.00 год.) 

20-го октобра 2019

Фараоны (Културный дім Раківчік, 15.00 год.)

22-го октобра 2019

На ревізію (Културный дім Снина, 18.00 год.)

Остра сатірічна комедія о жывоті і роботі сільского старосты і о тім, як рішыв проблемы сільскых людей. В пєсі найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.

26-го октобра 2019

Обіцянкы (Културный дім Суків, 17.00 год.)

27-го октобра 2019

Фараоны (Културный дім Нижня Полянка, 15.00 год.)

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі