Голосник

Пропозиция покликаня в Польскій Публичній Телевізиі меншынового проґраму

0

Соймова Комісия Нацийональных і Етнічных Меншын переслала на рукы Міністра Культуры дезидерат тыкаючий ся покликаня в Польскій Публичній Телевізиі загальнопольского проґраму присвяченого нацийональным і етнічным меншынам. 

Пропозиция Комісиі приготовлена была цілю близшого познаня культуры нацийональных і етнічных меншын заселяючых Польску Республику. В документі підкрислено, што незалежно од богатства змісту присвяченых меншынам інформаций доступных в інтернеті і в книгарнях, сутьову ролю в публичній едукациі мают нацийональны медия, в тым телевізия

В писмі мож м.ін. чытати, што […] Комісия звертат ся до Міністра з вопросом о опрацуваня концепциі і ґарантию цикличной емісиі загальнопольского телевізийного проґраму, якій присвячений мал бы быти істориі, культурі та соспільній діяльности нацийональных, етнічных меншын та соспільности хоснуючой реґіональний кашебскій язык. Сес проґрам дал бы можніст шырокому кругови одберачы близше познати культуру нацийональных і етнічых меншын заселяючых обшыр Польской Республикы. 

Початковий проєкт змісту дезидерату дакус ся ріжнил од того схваленого Комісийом. На внесок посла партиі Право і Справедливіст (пол. PiS), Шымона Ґіжыньского, был з него вышмарений запис про вызбываня ся стереотипів, як основы згідного спілжытя векшыны і меншыны. Подля Ґіжыньского такій запис был непотрібний, а міг бы служыти лем шыріню непорозумлінь ци ідеолоґізациі. Што до самой загальной думкы дезидерату тыкаючого меншынового проґраму не мал він нич проти. 

Подля послів внескодавців, якы схвалили дезидерат на засіданю Комісиі Нацийональных і Етнічных Меншын, такій проґрам причынял бы ся до громадяньской і соспільной інтеґрациі осіб, якы належат до нацийональных і етнічых меншын, а тіж реалізациі принципу рівного трактуваня осіб без огляду на етнічне походжыя, о чым бесідує Устава з дня 6. січня/януара 2005 р. про нацийональны і етнічны меншыны та реґіональний язык.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар