Голосник

Публіковала ся перша вызва на підпору меншыновой културы

0

В пятніцю 29-го децембра 2017-го року Фонд на підпору културы народностных меншын публіковав першу вызву на передкладаня жадостей о здобытя фінанчных средств формов дотації або штіпендії на підпору проєктів в области културы народностных мешнын. О здобытя дотації можуть жадати членоце 13-ох державов вызнаных народностных меншын.

Директор фонду Норберт Молнар обіцяв публікованя першой вызвы до 15-го децембра 2017-го року. Тота дата не была дотримана і так є і подаваня жадостей продовжене до 5-го фебруара. Вырішіня о поданых проєктах бы за інформаціями на сайті інштітуції мали быти публікованы до 4-го апріля.

Про Русинів  три проґрамы і майже 500 тісяч евр

Русиньска народностна меншына може жадати фінанчну підпору в рамках трьох проґрамів: Підпора културно-освітньой діялности і освітньой діялности, наукы і досліджіня; Підпора літературной, выдавницькой діялности і Підпора театралного, музичного, танечного, вытварного і авдіовізуалного уменя. Каждый із тых проґрамів має свої далшы підпроґрамы.

Русины дістали із цілкового бюджету выділеного про народностны меншыны на рік 2018 6,4 процента, што предтавлює 491 520 евр. Хто вшытко може жадати о дотації і якы суть условії про здобытя дотацій є детайлно розписано на сайті фонду.

Хоць была публікована перша вызва, моментално іщі не мож реґістровати ся як жадатель на сайті фонду. Жадатель притім мусить жадость выповнити як електронічно на офіціалнім сайті, так і фізічно загнати жадость поштов.

Фонд на підпору културы народностных меншын  

Фонд на підпору културы народностных меншын выникнув ку 1-му юлу 2017-го року. Його зряджіньом ся фінанцованя народностных меншын перенесло од 1-го януара 2018-го року із Уряду влады Словацькой републікы, котрый рішыв фінанцованя дотеперь.

Фонд має забезпечіти транспарентный і якостный фаховый поступ при роздільованю грошей і має підпорити всокочіня, выражіня, охорону і розвиток індентічности културных вартостей народностных меншын. Приголошены проєкты будуть по новому оціньовати фаховы рады, в котрых складі мають своїх представителів фаховці із конкретных областей културы.

Із 8 міліонів евр, котры каждый рік прийдуть про меншыны до фонду, будуть 4 процента схоснованы на ход інштітуції і решта буде розділена про меншыны.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар