Голосник

ПУНА (PUL’S) глядат професийоналисток

0

Наш єдиний професийональний фольклорний ансамбль – Піддукляньскій Умелецкій Народний Ансамбль (PUL’S) оголосил дальшу дату рекрутациі на членів женьской ґрупы колективу. Значыт – тым разом пряшівскій ансамбль глядат той красшой части людского рода, котра мала бы вести професийональну роботу в рамках фольклорного ансамблю.

Така рекрутацийна стріча за послідній час одбыла ся 27. жолтня/октобра т.р., але завідуючы ансамбльом рішыли оголосити і дальшу рекрутацию. Тота пройде о два тыжні, в пятницю 18. листопада/новебра т.р. в балетовій сали ПУНА в Пряшові. Ансамбль глядат молодых дівок, котры достали бы роботу в балетовій ґрупі. Радо будут виджены кандидаткы, котры мают деякій досвід повзязаний з балетовым ци народным танцьом, ачий брали участ в другых русиньскых непрофесийональных ансамблях.

Професийональна робота в рамках Піддукляньского Умелецкого Народного Ансамблю то не лем джерело штоденного утриманя, але і почутя розвиваня особистых пасий, можніст выступуваня на сценах цілого світа з причыны далекых турне, але тіж – а може предовшыткым – зберіганя рідной русиньской культруры.

Піддукляньскій Умелецкій Народний Ансамбль выникнул в 1955 році в Пряшові, на тамтот час як украіньскій ансамбль. В колективі, котрий творят три части – танцувальна, співоча і музычна – робит більше як 40 артистів. За ціле істнуваня выховал понад 500 професийональных співаків, музыків, танцуристів, котры днес являют ся інструкторами, солистами, або членами інчых фольклорных ансамблів, так в Словациі, як і заграницьом. Днешній ПУНА фунґує як професийональна русиньска інституция культуры, котра вказує найвысший рівен артистичной діяльности, будучы взором для вельох подібных непрофесийональных русиньскых колективів того рода во світі, якы з захопліньом смотрят на кажду обшыр діяльности ПУНА – він бо окрислят абсолютну вершыну професийональности в тым просторі. Більше з істориі ансамблю чытайте на його сайті.

puls_nabor

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар