Голосник

Рабунок в грекокатолицкій церкви в Патоці

0

Вночы з 28. на 29. квітня/апріля т.р. незнаны справці вламали ся до грекокатолицкой церкви Покровы Пресвятой Богородиці в Патоці, яка находит ся в юрисдикциі вроцлавско-ґданьской єпархіі УГКЦ. Злодіі до храму вошли через выгляд од запрестольной части, де перше выламали крату.

З ризниці, де были переховуваны богослужебны предметы і священничы ризы, злодіі зрабували дві чашы та два дискосы. Окрем того вкрадено ґратя до наголосніня, мікрофон, дрібны грошы, ай золотий напрестольний крест. Зрабувано тіж зрыхтувану з бронзы пропамятну таблицю, яка припоминала про 1000-літя хрещыня Руси. Як чытаме в комунікаті вроцлавско-ґданьской єпархіі УГКЦ, про вламаня одраз была повідомлена місцева поліция, як тіж римокатолицка ліґницка єпархія, яка свойом юрисдикцийом находит на юрисдикцию грекокатолицкой Церкви.

Грекокатолицку громаду в Патоці і околицях творят Лемкы выгнаны 70. років тому з рідных земель та іх потомны. Храм Покровы Пресвятой Богородиці был высвячений в 2010 році. Перше, бо од 1957 рока, місцевы грекокатоликы корыстали з гостинности римокатолицкого костела в Модлі. В Модлі же, попри костельови, од 1947 рока постепенно прибыват лемківскых могыл.

фот. www.dolnoslaskie.fotopolska.eu

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар