Голосник

Рішыня собору ПАПЦ про збіркы на православны парохіі в Креници і Высовій

0
15. листопада/новембра 2018 р. в Варшаві засідал собор єпископів Польской Автокефальной Православной Церкви. Серед піднятых постанов нашли ся дві, якы тыкают двох православных осередків на Лемковині.

Собор зосередил ся перше на зовнішніх справах. Владыкы розправляли м.ін. про днешню ситуацию на Украіні, як іде о пробы сотворити єдину помістну украіньску православну церкву. Рішыня підняте в тій справі выкликало в послідніх днях шор контроверсий. Подля деякых коментаторів, ПАПЦ ословило ся по страні Московского Патріархату в спорі медже ним а Вселеньскым Патріархатом о будуче украіньского православя.

В другій части нашли ся внутрішні справы ПАПЦ. Выголошаны были справописы з проведеных акций, оціняны были односины з другыма помістныма церквами, як тіж занято ся справописом з вчыня реліґіі і фунґуваня Православной Богословской Семінариі в Варшаві.

Собор владыків ПАПЦ рішыл про загальномитрополитарны збіркы фондів на выбраны парохіі. В січни/януари 2019 р. збераны будут даткы на парохію св. Владиміра Великого в Креници. Два місяці пізнійше, в марци 2019 р. в цілій Польщы проведена буде збірка на Мужскій Монастыр в Высовій, при якым – окрем монастыря – находит ся деревяна церков св. Михала з 1779 р., будуча місцевом парохіяльном святыньом. Під опіком монахів є тіж ділянка на Святій Горі Явір, на якій в плянах є побудуваня новой, православной каплиці.

На офіцияльным сайті ПАПЦ находит ся полний зміст справопису з послідього засіданя та поданы сут номеры банковых рахунків, на якы мож заганяти даткы.

фот. Вікіпедия

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар