Голосник

Русиньскій язык барз красні звучыт… (в парляменті)

Олена Папуґа, посланкыня Нацийонального Згромаджыня Сербской Республикы, на сесиі паряаменту в Бельграді выголосила промову в русиньскым языку, котра была a vista переведена до сербского языка Владиміром Бодянцьом.

Посланкыня Олена Папуґа в своій нештоденній активности схоснувала закон о хоснованю языка і писма, котрый дає можніст нацийональным меншынам хоснувати материньскій язык в публичній сфері. Дотля тото право мали в парляменті лем тоты меншыны, котрых в переписі єст веце як 2% в цілій Сербіі, то є Мадяре і Боснякы. Але ту зас, завдякы активности руснацкой посланкыні парлямент принял поправку, на основі котрой право хоснувати материньскій язык в парляменті мают вшыткы вызнаны нацийональны меншыны в Сербіі. В практиці лем Олена Папуґа, котрой госло звучыт «быти і остати Руснаком», хоснує право і пригварят ся в Нацийональным Згромаджыню Сербской Республикы по свому.

Окрем того русиньскій язык єст в автономічній Войводині признаный як офіцийный і на тот язык обовязково сут тлумачены писма і урядовы законы обовязуючы на обшыри Войводины.

Теперішнє выступліня Олены Папуґы перед сербскым парляментом тыкало ся проблемів з доступом до шкільных підручників в русиньскым языку і неясного будучого головной фабрикы в Рускым Керестурі – закладу перерабляня і морожыня ярин «АБЦ Фуд». Великій комбінат был приватизуваный од 1990 р., але за вшыткы рокы не є привернена в ним продукция, ани не сут выплачены долгы, котры бы дирекция мала выплатити ґаздам і робітникам фабрикы.
Промова по русиньскы, котру выголосила Олена Папуґа, была барз позитивні оцінена і інчыма послами, не лем з єй домашньой партиі – Ліґі Социяльдемократів Войводины, але і інчых партий. Были опініі, што «русиньскій язык барз красні звучыт».
Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі