Голосник

Лемкы чекают доднес на свою церковну структуру… – проґрам «Говорить Пряшів» – пятниця, 18.10 год.

Радийо Русин.фм з Братиславы як каждый тыжден приносит порцийку вісти о плянуваных культурных подіях і роботі русиньскых інституций – музею, театру і ансамблю Пульс.

В Книжници.фм бібліотекар Ігор Латта буде чытал байкы од Штефана Смолея пн. Астряб і курка, Чудный сон і Старый волк.

Целебритом того тыжня буде лемківскій владыка Василь Масцюх – теолоґ, церковный і нацийональный русиньскій діяч серед Лемків. Вродил ся Василь Масцюх 30. марця 1873 р. в Новій Веси на західній Лемковині. Вчыл ся в народній школі і ґімназиі в Новым Санчы, потім студиювал богословя в Перемышли і во Львові, а пак в Відни, де отримал в 1903 р. званя доктора теолоґіі. Іщы перше, в 1899 р., был рукоположеный. В 1910 р. выдал книжку «Церковне право супруже», на основі котрой, будучы професором канонічного права в перемышльскым Єпархіяльным Інституті Теолоґічных Студий, в 1912 р. оборонил габілітацийну дисертацию – отримал званя приватного доцента канонічного права Львівского Університету. Коли зачала ся І світова война, як вельох Русинів, был поневоленый в першым в Европі концентрацийным лаґрі в Талергофі (1914-16 рр.), по чым служыл войсковым капеляном в австрийскій арміі до 1919 р.

Петро Медвід в Перличках прочытат дві короткы вісти, котры были надрукуваны в ґазеті «Нова Неділя» в вересни/септембрі 1939 р. Першый допис обвіщат выбух войны, котру на тот час зове ся войном медже Польщом а Німеччыном. Споминат ся тіж о перебраню войсковой адміністрациі над Словацийом через німецкє войско. Як было пояснене, тота німецка армія мала боронити незалежніст словацкой державы, а каждый Словак мал быти напомічный в тым рішыню. Другій допис єст з обшыри спорту про успішны мачы нашой футбольовой команды ФК Русь в рамаках мадярской ліґы.

Теодозия Латтова в Припомінці буде роздумувала про Словацкє Нацийональне Повстаня – славне і жертвенне воюваня громадян ріжных нацийональности против Німцям і коляборантам.

foto – wikimedia

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі