Русины на Міністерстві загранічных діл США

0

Як повідомив портал Голос Карпат член Світовой академії русиньской културы Валерій Падяк, 18-го новембра 2016-го року у Вашінґтоні проходила далша стріча представителів Міністерства загранічных діл Споєных штатів Америкы у справах Европы і Евразії із актівістами з Україны і представителями Карпаторусиньского конзорціюма Северной Америкы односно проблемів русиньской народности на Україні. Подібна стріча одбыла ся вже минулый рік.

Представителі Русинів підкреслили складну сітуація односно діалоґу з Українов на тему вызнаня русиньской народности в тій державі. Припомянули, же Україна зіставать єдинов европсков державов, котра не вызнавать Русинів за окремый народ. Україна іґнорує пожадавкы Русинів, наприклад в справі одкрытя класів, де бы ся учів русиньскых язык, історія, література і култура Русинів на школах в Закарпатьскій области. Міністерство освіты Україны так само не робить нич про то, жебы была на Ужгородьскій націоналній універзіті одкрыта катедра карпаторусиністікы, хоць Русины таку пожадавку декларовали, о чім были так само інформованы представителі америцького міністерства загранічных діл.

Навспак, за словами Падяка на Україні вже чверть столітя продовжує ідеолоґія, котра діє на хосен асімілації Русинів, оскаржать русиньскых актівістів в медіах і означує русиньскых рух як сепаратізм.

Покля сучасна влада на Україні досправды хоче демонштровати прихыльность ку европскым вартостям і будує модерну демократічну державу, має вызнати за леґітімне рішіня Закарпатьской областной рады із 2007-го року о вызнаню народности „Русин“ і забеспечіти Русинам право на освіту в материньскім языку на вшыткых рівнях школства – од основных шкіл, аж по універзіту, говорить про портал Голос Карпат Валерій Падяк.

На стрічі з представителями міністерства брали за Русинів участь Павел Роберт Маґочій, Валерій Падяк, Джон Ріґеттій, Марія Сілвестрі, Ніколас Купенськый, Карен Варіян, Джім Камінськый і Мікулаш Поповіч. День перед тым, 17-го новембра, делеґація Русинів навщівила амбасаду Україны у Вашінґтоні.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Share.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.