Голосник

Рыджык выберат лем чысты місця. Свято гриба уж в тот вікенд в Высовій

12. едиция Свята Рыджыка пройде в найблизшу суботу і неділю в Высовій. Тото особливе свято орґанізуване є выключні на обшыри Лемковины і притігат любителів збераня грибів, а конкретно рыджыків, з цілой Польщы.

«Тогорічный проґрам обнимат велику порцию ліса» – бесідує Катажына Мєрнік-Пєтрушевска, спілорґанізаторка імпрезы. «Свято Рыджыка орґанізуєме довєдна з Державныма Лісами, зато тым разом вшытко обертало ся буде не лем довкола рыджыка, котрый царствує при нагоді той подіі, але тіж ліса. Будут розмаіты поґаданкы, конкурсы, варштаты » – вычыслят К. Мєрнік-Пєтрушевска.

В ательє Рыся, В бістро в голодного Волка – парк в Высовій здомінує еко-етно-фольк ярмак

Головном і постійном частю проґраму Свята є конкурс «Полюваня на Рыджыка». Парарельно проходити будут ріжны варштаты і прелекциі. Уличкы Здройового Парку в Высовій замінят ся в еко-етно-фольк алейкы, в котрых парудесят выставців презентувало буде своі выробы, од ручні вырабляных лжыць, різб, кошыків, горців, сницарскых артефактів, зіля, коронок, бібельотів з бібулы, аж по натуральны косметикы, облечыня і множество еколоґічных, не лем грибовых, спожывчых продуктів.

Плякат промуючый імпрезу представлят ілюстрацию Генрика Савкы, знаного польского рисовника-сатирика, є то словно-рисунковый жарт, навязуючый до тогорічного госла подіі Ліс в кухни, кухня в лісі. «Генрик Савка улюбил сой Низкій Бескід, єст нашым частым гостьом. Од парох років підперат нас своіма рисунками і все нам штоси файне малює» – пояснят орґанізаторка.

На неділю заплянувано концерт Капелі Ганкы Вуйцяк. «Ганка Вуйцяк має в собі тілько енерґіі і такій голос, што думам, же вшыткы, котры придут на Свято Рыджыка, будут захоплены» – захвалят К. Мєрнік-Пєтрушевска.

Спосіб на рыджыка

Свято Рыджыка помалы стає ся візитівком не лем Высовы, але і реґіону. «Рыджык то гриб, што не росне всядиль» – пояснят К. Мєрнік-Пєтрушевска. «Улюбил сой чысты, незатоптаны місця, де є свіже повітря. Бесідує ся, што рыджыкы то вызначникы здоровля, самой натуры. Люблят холодне повітря і здорову землю. Правдивый гриб росне такой всядиль в Польщы, а рыджыкы в великій мірі практичні лем на полудни, особливо в Низкым Бескіді» – доплнює.

Можливости зрыхтуваня рыджыків є вельо, од смажыня, маринуваня, квашыня – аж по додаток, напр. як елемент до сосу, до макарону, або мяса. «По мойому найсмачнійшы сут рыджыкы смажены на гусячым смальци, евентуальні на маслі, з цибульом і капином чеснку, то є найпростійшый смак, але квінтесенция самых рыджыків» – захвалят орґанізаторка. «Другым способом на рыджыкы єст іх заквашыня. То не єст просте, але мают пак специфічный смак і посліднім часом стали ся дакус елітарным продуктом. Або просто мож додати дакус верхнины і до макарону або комперів, мают товды такій легко оріховый смак» – кінчыт К. Мєрнік-Пєтрушевска.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі