Шлеск привитат лемківску справу. В проґрамі фільм і дебата

0

12. грудня/децембра 2017 р. на Шлеску пройде промоция фільму «Аж і слезы не старчыли», якій присвячений є 70. річници акциі Вісла. В проґрамі є тіж дебата пн. «Лемкы і Шлезакы – невыгідны спільноты». 

Подія пройде в Кінотеатрі Ріальто в Катовицях. О 18.00 год. зачне ся проєкция документального фільму в реж. Мариі Сільвестрі та Джона Ріґетті, премєра якого проходила на яр 2017 р. вчас центральных упамятнінь выгнаня. В дальшій части акциі пройде наукова дебата, цілю якой є приближыти спільны темы Лемків і Шлезаків. Наголовок дебаты є вымовний – «Лемкы і Шлезакы – невыгідны спільноты». Накрислят він проблем істнуваня обох меншын в днешніх обставинах, бергучы до увагы і траґічны долі тых наций. 

Участниками дебаты будут др габ. Ева Міхна – адюнкт в Інституті Американістикы і Польонійных Студий Ягайлоньского Університету в Кракові, яка занимат ся спільном темом Лемків і Шлезаків, др габ. Олена Дуць-Файфер – лемківска вчена, основателька лемківской філолоґіі та выкладачка Ягайлоньского Університету, проф. Звіґнєв Кадлубек – выкладач Шлезского Університету, активіста шлезской меншыны та др Єжы Ґожелік – ведучий Руху Автономіі Шлеска. 

Орґанізаторы подіі звертают увагу на цінніст документального фільму «Аж і слезы не старчыли». Кінотеатр Ріальто в інформациі про проєкцию подає, што материял до фільму был збераний в штрырьох просторах, т.є. фактоґрафічным і емоцийональным, історичным і сучасным, індивідуальным і соспільным та внутріспільнотовым і загальноспільнотовым. В анонсі дає ся притиск на неоцінений запис споминів свідків выгнаня, якы так высловлюют опініі про саму депортацию, як і теперішнє лемківской спільноты.

Фільм має задачу конфронтувати, давати можніст вказувати погляды і опініі другым меншынам, якы в подібний до Русинів спосіб были тоталітарныма режімами выняти спід права, а до того переслідуваны. В примірі Лемків траґедия проявлят ся в абсолютний спосіб – стратили они безповоротно будувану столітями вітчызну. З другого боку, як ся пише в анонсі, фільм высловлює спільнотову памят про Віслу, прото тіж повинна она быти конфронтувана з інчыма, паралельныма спільнотами памяти і траґедий. 

Представителі лемківской і шлезской меншын од років спілпрацуют і ся сперают. Припомнийме, што Шлезакы допомагали Лемкам при орґанізуваню упамятнінь в місци бывшого концентрацийного лаґру в Явожні, де одкрыта была пропамятна таблиця. 

Вступне на подію то 10 зл (8 зл знижковий). Білеты мож придбати за тым мотузком

Share.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.