Голосник

Штефан Кічура – Русин на днешні часы – «Говорить Пряшів» – пятниця, 20.00 год.

0
Радийо Русин.фм з Братиславы як каждый тыжден приносит процийку вісти о плянуваных культурных подіях і роботі русиньскых інституций – музею, театру і ансамблю Пульс.

В Книжници.фм бібліотекар Ігор Латта буде чытал вершы Петра Мурянкы.

Целебритом того тыжня буде Штефан Кічура – Лемко народженый в Детройт в штаті Мічіґан. Перед великом войном мама привезла го до рідного села Верхімка над Попрадом, де Штефан Кічура пережыл дітинство. Коли вернул до Америкы, робил як редактор ґазеты «Карпатска Русь» і діяч Лемко-Союза. В шістдесятых роках ХХ ст. довєдна з Лемком з Ясюнкы – Теодором Докльом, намагал ся змінити просовітскы і прокомуністичны стремліня Лемко-Союза. Під його влияньом Лемко-Союз першый раз одсудил насильне выселіня Лемків в 1947 р. в рамках операциі «Вісла». Його головный політичный проґрам то голошыня потребы вертаня Лемків на Лемковину, жебы не стратити свойой достоменности.

Петро Медвід в Перличках прочытат короткы вісти надрукуваны в ґазеті «Карпатска Неділя» в червци/юнію 1940 р. Будеме реляцийонувати будову бетонового мосту на Тересві, продукцию гадвабу і цілодержавный курс лікарів в Унґварі, якій дотулял ся маляриі.

Теодизия Латтова в Припомінці буде роздумувала про бандуркы і бандурчата.

на фото горі – вид з поляны Выжні Млакы на Верхімку – wikimedia: Jerzy Opioła – Praca własna. По правій стороні Штефан Кічура – фотоґрафія з «Русинсько-Америцького Календаря Карпато-Русинського Общества на ювілейный рік 2004-2005», ред. Річард Д. Кастер

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментар