Голосник

Штець дістав двократну платінову платню

Штефанови Штецьови „іде карта“. Выпродавать свої концерты, што ся потвердило і в рамках проходячого Štefan Štec & Fajta TOUR Jeseň 2019, а нелем то. Успішно ся продавать і його албум.

По веце як році од выданя дебутового діску під назвов Полетів бы-м на край світа належыть албум Штефана Штеця меджі найпродаванішы на Словакії.

Двократна платінова платня

Штець є моментално на турне зо свойой ґрупув Файта. 9-го новембра концертовав у братіславскім клубі Atelier Babylon, а не быв то лем концерт. Почас події русиньскый співак перевзяв двократну платінову платню за кількость проданых дісків.

Штець продав зо свого дебуту понад 6 тісяч дісків, што є на словацькы реаліі досправды шумне чісло, якы не досягують ани дакотры інтерпреты популарной музикы. При албумах з народнов музиков, як є то в припаді Штефана Штеця, суть такы чісла досправды великым вынятком.

„За остатніх 10, може 20 років собі не споминам, коли тот жанер досяговал такы чісла. Цілково ся продало понад 6 тісяч фалатків фізічных дісків і то є барз добрый індікатор, котрым ся на словацькій сцені, без огляду на жанер, може похвалити лем узка ґрупа умелців. В нашій бранджі то потверджує міцне одношіня меджі любительом і умелцьом,“ цітує портал Gregi.net Маріяна Шокі, котры робить у сфері пордая музикы.

Албум припоминать домів

„Думам, же людям припоминать домів, коріня, походіжня і є щірый. Я то так чув, так єм то записав,“ повів на марґо оціненого албуму Штефан Штець.

Домінік Маніак, котрый є прімашом Штецьовой капелы Файта, быв з оцініня несподіваный. „Мило ня то несподівало і потішыло. Є то файный feedback од людей, за што їм дякуєме. Є то про нас сатісфакція за то, же сьме вытворили дашто, што не є першопланове і не забуде ся такой по выслуханю,“ повів прімаш.

Штець, котрый є теперь на турне, уж приготовлює выдати новый албум, котрый є вже готовый. Мав бы дістати до продая кінцьом того року. Буде ся звати Дує вітор. Як повів співак, „буде свіжый, музично зрілішый, будуть там інтересны і неочекованы співпраці а вірю, же людям принесе красны емоції“.“

Жрідло фотоґрафії: Штефан Штець.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі