Голосник

Словацькый премєр участный на 75-ій річніці освободжіня Калинова

В суботу 21-го септембра 2019-го року проходили в Калинові, в окресі Меджілабірці, святкованя 75-ой річніці освободжіня села. Калинів быв першым освободженым селом на теріторії бывшой Чехословакії.

На події брав участь і премєр Словацькой републікы Петер Пеллеґріні. По пєтнім акті кладжіня вінців говорив о одвазі тых, котры почас Словацького народного повстаня і Другой світовой войны стояли в першых фронтовых лініах і о надії, котру принесли. Інформовала о тім аґентура TASR. На святкованях быв і підпредседа влады Ріхард Раші. За павшых вояків была одслужена панахіда, участны могли собі посмотрити і воєньску авіацію.

Кланям ся перед героями

„Кланям ся днесь перед геройами, котры в тых лісах положыли свій жывот про нашу будучность. Суть то вартости і бої, котры собі днесь нияк не знаме представити. Про нашы молоды ґенерації є цалком непредставительным, же їх верстевници сперед 75-ох років будили зо знаньом, же ся може вже ниґда не дожыють западу Сонця. Бо смерть была тов найзвычайнішов справов у їх втогдышнім жывоті,“ повів у Калинові премєр.

Як продовжовав, і вдяка тым величезным пожертвованям днесь жыєме жывотом, котрый ся не дасть порівняти зо жывотом нашых отців і дідів. Премєр апеловав, жебы мали люди в почливости тых, котры войовали за свободу.

У своїм прояві підкреслив, же за освободжіня Словакії заплатила найвысшу ціну Червена армія і вєдно з ньов воюючі Чехы і Словаци а „представителі многых далшых народів і армія Румунії.“ Хоць святкованя проходили в русиньскім селі, Русинів воюючіх за освободжіня премєр не спомюнув. При освободжіню Калинова вмерло 1200 совітьскых вояків.

Сімбол освободжіня

Член Централной рады Словацького союзу протифашістічных бойовників Ян Угрік описав Калинів як сімбол освободжіня.

„Тутешньов пєтнов громадов ся в Словацькій републіці шторік одкрывають споминовы святкованя освободжіня нашых сел і міст,“ повів. Звернув увагу на то, же выбойованы вартости сьме повинны сторожыти.

В рамках святковань была розказом міністра обороны Словацькой републікы Петра Ґайдоша уділена Памятна медайла ку 25-ій річніці выникнутя Озброєных сил Словацькой републікы Янови Штефанікови і Памятна медайла ку 75-ій річніці Словацького народного повстаня і закінчіню Другой світовой войны селу Калинів.

Оціньовав і Клуб ґенералів Словацькой републікы. Селу Калинів уділив із нагоды 75-ой річніці освободжіня Заслужный крест Рудолфа Віеста І. ступня, Памятну медайлу Яна Ґоліана ІІ. ступня собі зо святковань однесли Марія Реґрутова і Анна Балейова.

Святкованя коло обновленого памятника

Святкованя 75-ой річніці освободжіня Калинова в суботу проходили коло обновленого памятника.

Як інформовав аґентуру TASR староста села, оправа тырвала рік і вытраты были в сумі понад 110 тісяч евр. 81 тісяч Калинів здобыв з еврофондів, 30 тісяч дала селу влада почас выїздового засіданя в Меджілабірцях.

Памятник освободжіня выбудовали в році 1964 із нагоды 20-ой річніці освободжіня. Автором є русиньскый академічный скулптор Франтішек Ґібала, котрый походив із села Крайна Поляна в окресі Свідник. Тот зобразив совітьского вояка, котрый тримать в руках над головов дітину, сімбол нового жывота на освободженій теріторії.

Жрідло фотоґрафії: Peter Pellegrini.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі