Голосник

Словакія схвалила акчный план про меншыны

На засіданю влады Словацькой републікы дня 26-го октобра 2016-го року влада схвалила Акчный план охраны прав особ, котры належать ку народностным меншынам і етнічным ґрупам на рокы 2016 – 2020. Цільом документу є забеспечіти ефектівну, переглядну і сполягливу сістему охраны і підпоры прав членів народностных меншын і етнічных ґруп, включно посилніня інштітуціоналного забеспечіня. Інформує о тім офіціалный сайт уповномоченого влады Словацькой републікы про народностны меншыны і етнічны ґрупы.

За словами уповномоченого про народностны меншыны і етнічны ґрупы, Ласла Буковского, є схваліня акчного плану добров вістьов про народностны меншыны, кідьже є то першый матеріал, котрый так концепчно, як і на уровни конкретных кроків, вытварять простор про імплементацію владной політікы в одношіню ку народностным меншынам.

Акчный план выникнув в згоді із уснесіньом влады СР, котрым была схвалена пропозіція Цілодержавной стратеґії охраны і підпоры людьскых прав в Словацькій републіці і котрым влада дала выпрацовати в меджах своїх компетенцій акчны планы про зранительны і марґіналізованы ґрупы сполочности, про котры дотеперь не суть забеспечены леґіслатівны рамкы, інштітуціоналны рамкы, окремы стратеґії і рамкы аплікачной практікы. Акчный план народностных меншын выпрацовав уряд уповномоченого вєдно із представителями народностных меншын.

Акчный план встановює сім цілів, котры суть напрямены головно на забеспечіня комплексного приступу ку творіню правных предписів дотуляючіх ся прав і позіції народностных меншын і етнічных ґруп; зліпшіня сістемы підпоры културы меншын; ефектівнішого браня до увагы шпеціфік выховно-освітніх потріб особ, котры належать ку народностным меншынам; зліпшіня условій хоснованя языків народностных меншын і етнічных ґруп в практіці; зліпшіня інформованости верейности о народностных меншынах і етнічных ґрупах посередницьтвом медій ітд.

Жрідло фотоґрафії: dnesky.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі