«Слово» – 10-та неділя по Сошетствії Святого Духа – неділя, 9.00 год.

0

Ісус Хрістос сходячі із горы Тавор стрітив ся з отцьом хлопця, котрого мукарив злый дух. Кідь отець просить о выздравліня свого сына, Ісус реаґує незвыкло: вытыкать отцьови і народу невірьство і роспущеность. Тот отець приписовав зло, што діло ся його сынови, діяню Місяця. Бо то з ним діяло ся на нов Місяця. Так діявол побаламутив людей, жебы вірили йому, а не Божому слову, котре повідать: Вшытко, што Бог сотворив, было добрым. І так як Місяць є сотворіньом Божым, та зло переносило ся тым способом на Бога, як на того, котрый його сотворив. Ісус наказав привести хлопця і тогды діяло ся з ним так само, як на нов Місяця, і то на доказ того, же не Місяць, але злый дух діє на того хлопця. Ісус выгнав злого духа і хлопця выздравив. Посолство днешнього євангелія і про нас є, жебы вірити Божому слову, а не злому. Вірити, же не Місяць, не звізды діють на чоловіка (як нас то хоче злый пересвідчіти через гороскопы і далшы діавольскы вынаходы). Вірити, же не зло є силніше, не зло мать послідне слово, но добро. Ісус на закінчіня говорить: Сын чоловіка буде убитый, но на третій день воскресне. То значіть, і нам говорить: Не смотьте на то, же я хоць Божый Сын, котрый мам владу над природов, над нечістыма духами, котры ся трясуть передмнов, не смотьте на то, же буду пониженый, убитый, но воскресну і знову прийду у славі як Судця вшыткых. Прото просьме і мы як тот отець: Вірю, помож мойому невірьству. Просьме о посилніня нашой віры в дефінітітвну побіду добра. Слава Ісусу Хрісту!

В неділю, 13. серпня/авґуста 2017 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 13. серпня/авґуста 2017 р. о 15.00, 20.00 год. і 14. серпня/авґуста 0 2.00 год. за русиньскым часом.

Фото: Гора Тавор. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Share.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.