«Слово» – 23-тя неділя по Сошетствії Святого Духа, праздник св. Димитрія Солуньского – неділя, 9.00 год.

0

Дорогы радіослухачі! Празднуєме память св. Великомученика Димитрія Солуньского. Його отець быв воєводом в місті Солунь. Коли ся розгоріло пронаслідованя за імператора Діоклетія, хоць не признавав ся явно ку своій вірі, но у своїм внутрі твердо вірив в Хріста.

Дома мав дві іконы Хріста і Богородіці, перед котрыма вєдно зо свойов женов ся молив і выпрошовав Боже благословіня. Бог їм подаровав дітину – Димитрія, котрый кідь підріс, привели го до домашній каплічці і указали святы іконы. В сердці малого хлопця загорів огень любви ку Хрістови. А як дошов до зрілого віку, быв поставленый імператором на місце свого отця, котрый уж перешов по небесну нагороду. Быв высланый з посланьом выкорінити хрістіанство в Солуні. Но Димитрій намісто того зачав сміло оголошати Хрістову віру, што привело до гніву імператора, котрый його дав заперти до вязніці. Там ся му появив діявол в подобі скорпіона і хотів його ранити до ногы, но Димитрій поблагословив го знаком креста, став на нього і задавив го. Тым было указано на його побіду над духовным неприятельом діяволом. Імператор в тім часі оддавав ся скверным жертвам і забавам. Мав любого борця ґладіатора Лія, котрый на вывышенім місці ставав до боя повекшости з хрістіанами, котрых зверьговав долов на копії і передавав мучітелной смерти. Проти нього выступив молодый хрістіан Нестор, котрый перед тым попросив благословліня Димитрія, і так переміг Лія. Імпереатор дізнавшый ся, же Нестор з благословліньом Димитрія переміг Лія, післав вояків і дав го пробити у вязніці, так прияв мученицькый вінець.

Св. Димитрій учіть нас своїм жывотом ставити Бога на перше місце, над карьєру, над міць, над славу того світа. Бо де є слава римской імперії, ці імператорів, вшытко поминуло, но слава мученика Димитрія перебывать з рока на рік, бо Бог прославлять тых, што Його прославляють. Посмотьме і на днешніх „імператорів“ того світа, як ся ставляють на місце Бога, думають собі, же они можуть вшытко, они одверьгли Бога зо свойого жывота, пронаслідують тых, што ся голосять ку Хрістови. Но посмотьме до історії на славу і міць давних владарів, так буде і з днешніма владарями того світа. І св. Димитрій най тыж учіть, як важне є кажде наше діло зачінати молитвов о Боже благословліня, жебы Бог быв прославленый в нашых ділах. І тогды і о нас буде платити тото, што можеме односити ку св. Димитрійови: Я прославлям тых, што мене прославляють. Слава Ісусу Хрісту!.

В неділю, 12. новембра (листопада) 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 12. новембра о 15.00, 20.00 год. і 13. новембра  o 2.00 год. за русиньскым часом.

Фото: Мученицьтво св. Димитрия. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Share.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.