Голосник

«Слово» – 24-та неділя по Сошествії Святого Духа Неділю – неділя, 9.00 год.

За Ісусом приходить чоловік, котрый находить ся в тяжкій сітуації. Дома має хвору дівочку, 12-річну, котра вмерала. Хоць сам быв началником сінаґоґы, мав высоку позіцію в ізраільскім народі, но не міг їй допомочі.

Ай кедь не вірив в Хріста, може задумовав вєдно з далшыма жыдами проти нього зло, педці гнаный бідов приходить і просить о здоровля про дівочку. Ісус встав і ішов із ним. Народ го притисковав із кажой стороны. Втогды єдна жена хвора на кровотечіня приступила одзаду і дотулила ся краю його плаща. Ісус заставив ся, жебы дізнати ся хто ся го дотулив. Робив то не зато, жебы не знав, але хотів одкрыти велику віру жены. Она єдина приступила ку Ньому із віров і была выздоровлена, іншы го лем притисковали без віры. Далше хотів додати смілости Яірови, котрому як раз повіли, же його дівочка вмерла. Но Ісус так як той жені говорить: Твоя віра тя сохранила.

Так і Яірови повів: Лем вірь і буде здрава. І іде до його дому і воскрешать єй із мертвых. Тыма двома подіями – вздравліньом хворой жены, котра выдала цілый свій маєток на лікарів, а без успіха, і воскресіньом дівкы Яіра Ісус вказує, же має владу над хворотов і смертьов. І нам днешнє слово говорить, жебы сьме наслідовали віру той жены. Жебы сьме приступовали ку Ісусови з великов віров, же Він є владарьом вшыткого. В його руках є і наш жывот. Вім може подати здоровля не лем тілу, але головно нашій душі, освободити єй од рабства гріха, як жену од кровотечіня. А він раз воскресить і нашы тіла при своїм другім приході ку вічній славі.

І так ниґда не падайме духом в ниякій тажкій сітуації, але з великов віров приступуйме ку Господу, жебы сьме і мы чули слова: Твоя віра тя сохранила, ідь в покою. Слава Ісусу Хрісту!

В неділю, 11. новембра 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 11. новембра 15.00 о 20.00 год. і 12. новембра о 2.00, год. за русиньскым часом.

Фото: «Воскресеніє дівкы Яіра», Ілько Рєпін. Жрідло: Wikimedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі