Голосник

«Слово» – 24-та неділя по Сошествії Святого Духа – неділя, 9.00 год.

Ку Ісусови приступує чоловік з великым жальом в сердці. Приходить отець дітины, котра умерала. Просить за єй выздравліня, жебы Ісус пришов до його дому. Ісус такой встав а ішов.

Но по дорозі ся одбывать іщі єдна подія, котра Ісуса затримала на даякый час. Єдна жена, котра од дванадятьох років терпіла на кровотечіня, не могла найти помочі. Цілый свій маєток выдала на лікарів, но без успіху. Коли видить приходити Ісуса, як окруженый множеством народа, говорить собі у своїм внутрі: Кедь ся дотулю хоць лем края Його облечіня, наістно буду здрава. Так і зробила, а такой учула в собі, же є выздравлена. Но Ісус ся такой заставив і звідує ся, хто ся його дотулив, бо із нього вышла сила. Хоць ученикы Йому опонують, же народ го притискать з каждой стороны. Та што то за вопрос? Но Ісус зіставать разный, а так тота жена зо страхом і трясучі ся приступує і повідать цілу правду. Ісус єй повів: Не бій ся, тебе сохранила твоя віра, ідь в покою.

Даме собі вопрос: чом Ісус хоче выявити тоту жену? Єднак, жебы указав, же хоць народ го притисковав, но тота жена ся го дотулила з віров. Потім, жебы додати віры Яірови, котрому праві повіли: Твоя дівка уж умерла, не затяжуй учітеля. Бо Ісус як тото чув, говорить йому: Не бій ся, лем вірь і буде уратована. А так ся і стало, кедь пришов до його дому воскреснув його дівку.

Но тыж Ісус тото робить і про нас, абы нам указати, же і нам треба приходити ку Ньому з таков віров, яку мала тота жена: Кедь ся дотулю, буду здрава. Жебы і мы сьме могли чути слова: Не бій ся, тебе сохранила твоя віра, ідь в покою. Слава Ісусу Хрісту!


В неділю, 1 децембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 1 децембра о 12.00 і 2 децембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі